गेवराई | प्रतिनिधी –
तालुक्यातील मौजे ब्राम्हगाव येथे २८ मे २०२६ रोजी घडलेल्या एका निंदनीय प्रकारामुळे परिसरात संतापाची लाट उसळली आहे. गावातील हनुमान मंदिरातील मूर्तीला अज्ञात समाजकंटकांनी मांस लावल्याचा प्रकार उघडकीस आला असून या घटनेचा ग्रामस्थांसह विविध सामाजिक व हिंदू संघटनांनी तीव्र निषेध व्यक्त केला आहे.
घटनेची माहिती मिळताच परिसरातील समाजबांधव, सामाजिक संघटनांचे पदाधिकारी आणि हिंदू संघटनांचे कार्यकर्ते मोठ्या संख्येने मंदिर परिसरात जमा झाले. यावेळी मंदिरात हनुमान मूर्तीचा दुग्धाभिषेक करून महाआरती करण्यात आली. तसेच धार्मिक वातावरणात शांततेचे आवाहन करण्यात आले.
ग्रामस्थांनी या घटनेतील दोषींना तात्काळ अटक करून कठोर कारवाई करण्याची मागणी केली आहे. या प्रकारामुळे धार्मिक भावना दुखावल्या गेल्याची भावना नागरिकांनी व्यक्त केली.
दरम्यान, पोलिसांनी घटनेची गंभीर दखल घेत तपास सुरू केला असून संबंधित आरोपींचा शोध घेण्यासाठी विविध पातळ्यांवर चौकशी करण्यात येत आहे. अद्याप कोणालाही ताब्यात घेण्यात आले नसल्याची माहिती मिळाली आहे.
गावात कायदा व सुव्यवस्था कायम राखण्यासाठी पोलिसांकडून आवश्यक खबरदारी घेतली जात असून नागरिकांनी अफवांवर विश्वास न ठेवता शांतता राखावी, असे आवाहन प्रशासनाने केले आहे.
