श्रीगोंदा | प्रतिनिधी
वाढती पाणीटंचाई आणि भूजल पातळी खालावण्याच्या समस्येवर मात करण्यासाठी चांभुर्डी येथील जिल्हा परिषद प्राथमिक शाळेत ब्रिटानिया डेअरी आणि सर नेस वाडिया फाउंडेशन यांच्या संयुक्त विद्यमाने आधुनिक रेन वॉटर हार्वेस्टिंग (पावसाचे पाणी साठवण व पुनर्भरण) प्रकल्प यशस्वीपणे उभारण्यात आला आहे. या उपक्रमामुळे शाळेच्या पाण्याच्या समस्येवर दीर्घकालीन उपाय उपलब्ध होणार असून पर्यावरण संवर्धनालाही चालना मिळणार आहे.
या महत्त्वपूर्ण सामाजिक प्रकल्पासाठी चांभुर्डी गावचे सुपुत्र तथा ब्रिटानिया डेअरीचे सर्वेसर्वा सागर चव्हाण यांनी पुढाकार घेत आपल्या मातृभूमी आणि शाळेबद्दलची कृतज्ञता व्यक्त केली. या प्रकल्पाच्या उभारणीत उमेश ढगे यांचे स्थानिक पातळीवर विशेष सहकार्य लाभले. त्यांच्या प्रयत्नांमुळे हा पर्यावरणपूरक प्रकल्प अल्पावधीत पूर्ण झाल्याची भावना ग्रामस्थांनी व्यक्त केली.
या प्रकल्पाअंतर्गत शाळेच्या इमारतीच्या छतावर पडणारे पावसाचे पाणी विशेष यंत्रणेद्वारे संकलित करून जमिनीत मुरविण्यात येणार आहे. त्यामुळे भूजल पातळी वाढण्यास मदत होणार असून उन्हाळ्यातही शाळेला पाण्याची कमतरता भासणार नाही. तसेच विद्यार्थ्यांमध्ये जलसंवर्धन आणि पर्यावरण संरक्षणाबाबत जागरूकता निर्माण होण्यासही मदत होणार आहे.
या उपक्रमाचे उद्घाटन मान्यवरांच्या हस्ते करण्यात आले. कार्यक्रमास विविध क्षेत्रातील मान्यवर, ग्रामस्थ, महिला भगिनी, शिक्षक, विद्यार्थी आणि पालक मोठ्या संख्येने उपस्थित होते.
ग्रामस्थांनी या उपक्रमाचे स्वागत करत भविष्यातही अशाच लोकहितकारी व पर्यावरणपूरक प्रकल्पांची अंमलबजावणी व्हावी, अशी अपेक्षा व्यक्त केली.
