श्रीगोंदा | प्रतिनिधी
श्रीगोंदा तालुक्यातील चांभुर्डी येथे ग्रामस्थांच्या वतीने दरवर्षीप्रमाणे यंदाही भव्य अखंड हरिनाम सप्ताह व ग्रंथराज ज्ञानेश्वरी पारायण सोहळ्याचे आयोजन करण्यात आले आहे. हा धार्मिक सोहळा ५ जून २०२६ रोजी प्रारंभ होणार असून १२ जून २०२६ रोजी काल्याच्या कीर्तनाने आणि महाप्रसादाने त्याची सांगता होणार आहे.
सप्ताहाच्या कालावधीत दररोज पहाटे काकडा आरती, भजन, ग्रंथराज ज्ञानेश्वरी पारायण, हरिपाठ तसेच विविध धार्मिक कार्यक्रमांचे आयोजन करण्यात आले आहे. रात्रीच्या सत्रात ज्येष्ठ व नामवंत कीर्तनकारांची कीर्तनसेवा होणार असून त्यामुळे संपूर्ण परिसर भक्तिरसात न्हाऊन निघणार आहे.
या सप्ताहाचे विशेष आकर्षण म्हणजे विविध नामांकित भजनी मंडळे आणि टाळकरी मंडळींची भजनसेवा. भाविकांच्या आध्यात्मिक उन्नतीसाठी विविध धार्मिक कार्यक्रमांचे नियोजन करण्यात आले आहे. तसेच दररोज सकाळचा नाश्ता, दुपारचे भोजन आणि सायंकाळच्या प्रसादाची व्यवस्था दानशूर अन्नदात्यांच्या सहकार्याने करण्यात आली आहे.
१२ जून रोजी सकाळी ९.३० ते ११.३० या वेळेत ह.भ.प. हरीभाऊ बाबा भोंदे महाराज यांच्या काल्याच्या कीर्तनाने सप्ताहाची सांगता होणार आहे. त्यानंतर उपस्थित सर्व भाविकांसाठी भव्य महाप्रसादाचे आयोजन करण्यात आले आहे.
या धार्मिक सोहळ्याचा लाभ घेण्यासाठी पंचक्रोशीतील भाविकांनी मोठ्या संख्येने उपस्थित राहावे, असे आवाहन आयोजक व ग्रामस्थांच्या वतीने करण्यात आले आहे.
