अंबाजोगाई | प्रतिनिधी
लोकनेते स्वर्गीय गोपीनाथरावजी मुंडे यांच्या स्मृतिदिनानिमित्त केज मतदारसंघाच्या आमदार सौ. नमिता अक्षय मुंदडा यांनी गोपीनाथगडावरील स्मृतीस्थळी जाऊन अभिवादन करत त्यांच्या पवित्र स्मृतींना विनम्र श्रद्धांजली अर्पण केली.
यावेळी बोलताना उपस्थित मान्यवरांनी स्व. गोपीनाथ मुंडे यांनी राज्याच्या राजकारण, समाजकारण आणि ग्रामीण भागातील सर्वसामान्य जनतेच्या सक्षमीकरणासाठी दिलेल्या योगदानाचा गौरव केला. तळागाळातील कार्यकर्त्याला नेतृत्वाची संधी देणारे, वंचित घटकांच्या विकासासाठी आयुष्य समर्पित करणारे आणि जनतेच्या प्रश्नांसाठी सातत्याने संघर्ष करणारे नेतृत्व म्हणून त्यांची ओळख सदैव स्मरणात राहील, अशी भावना व्यक्त करण्यात आली.
स्मृतिदिनानिमित्त गोपीनाथगडावर वृक्षारोपणाचा उपक्रमही राबविण्यात आला. या कार्यक्रमास महाराष्ट्र राज्याच्या पशुसंवर्धन, पर्यावरण व हवामान बदल मंत्री सौ. पंकजाताई गोपीनाथराव मुंडे, खासदार डॉ. प्रीतम मुंडे, आमदार सौ. नमिता अक्षय मुंदडा, पन्नगेश्वर शुगर मिल्सचे चेअरमन अक्षय मुंदडा, राम कुलकर्णी, संजय गभीरे यांच्यासह अनेक मान्यवर उपस्थित होते.
यावेळी उपस्थित मान्यवरांनी स्व. गोपीनाथ मुंडे यांच्या स्मृतीस्थळी पुष्पांजली अर्पण करून आदरांजली वाहिली. तसेच मुंडे साहेबांचे असंख्य समर्थक, कार्यकर्ते आणि प्रेमी मोठ्या संख्येने उपस्थित राहून आपल्या लाडक्या नेत्याला श्रद्धांजली अर्पण केली.
स्व. गोपीनाथ मुंडे यांच्या कार्याचा वारसा पुढे नेण्याचा आणि समाजहिताच्या कार्यात अधिक जोमाने योगदान देण्याचा संकल्प यावेळी उपस्थितांनी व्यक्त केला.
