सिन्नर, प्रतिनिधी : ग्रामीण भागातील विद्यार्थ्यांना स्पर्धा परीक्षांची प्रभावी तयारी करता यावी यासाठी लोणारी युवा संघ महाराष्ट्र राज्य संचलित श्री लोमेश ऋषी सार्व वाचनालय, अभ्यासिका व मार्गदर्शन केंद्र, मऱ्हळ बु. येथे रविवार, दि. ७ जून २०२६ रोजी स्पर्धा परीक्षा मार्गदर्शन उपक्रम उत्साहात पार पडला.
या उपक्रमाचे आयोजन संस्थापक अध्यक्ष विजय संवत्सरकर यांच्या मार्गदर्शनाखाली करण्यात आले. यावेळी सुरज आढाव (उपाध्यक्ष, लोणारी युवा संघ), एम. जी. कुऱ्हे सर (माजी मुख्याध्यापक), अरुण भालेराव सर तसेच किशोर कुऱ्हे सर यांनी विद्यार्थ्यांना स्पर्धा परीक्षांविषयी सविस्तर मार्गदर्शन केले.
या मार्गदर्शन उपक्रमाला विद्यार्थ्यांचा उत्स्फूर्त प्रतिसाद लाभला. स्पर्धा परीक्षेची तयारी, अभ्यासाचे नियोजन, वेळेचे व्यवस्थापन आणि विविध स्पर्धा परीक्षांमधील संधी याबाबत विद्यार्थ्यांना महत्त्वपूर्ण माहिती देण्यात आली.
लोणारी युवा संघ महाराष्ट्र राज्य ही संस्था ग्रामीण भागातील युवक-युवतींना रोजगार व नोकरीच्या संधी उपलब्ध व्हाव्यात यासाठी सातत्याने कार्यरत आहे. संस्थेच्या माध्यमातून मऱ्हळ बु. (ता. सिन्नर) आणि शिरसगाव (ता. येवला), जि. नाशिक येथे विनामूल्य अभ्यासिका सुरू करण्यात आल्या आहेत. या अभ्यासिकांमुळे ग्रामीण भागातील विद्यार्थ्यांना शांत, अभ्यासपूरक वातावरण आणि स्पर्धा परीक्षेची तयारी करण्यासाठी आवश्यक व्यासपीठ उपलब्ध होत आहे.
ग्रामीण विद्यार्थ्यांच्या शैक्षणिक प्रगतीसाठी आणि स्पर्धा परीक्षांमध्ये त्यांचा सहभाग वाढविण्यासाठी लोणारी युवा संघाचे हे कार्य कौतुकास्पद असल्याची भावना उपस्थितांनी व्यक्त केली.
