कुरुंदवाड | प्रतिनिधी :
शिरोळ तालुक्यातील न्यू इंग्लिश स्कूल, शेडशाळ येथे नशाबंदी मंडळ महाराष्ट्र राज्य, कोल्हापूर जिल्हा आणि विद्यालयाच्या संयुक्त विद्यमाने जागतिक तंबाखूमुक्ती दिन उत्साहात साजरा करण्यात आला. यावेळी विद्यार्थ्यांना तंबाखूमुक्तीची शपथ देऊन व्यसनमुक्तीचा संदेश देण्यात आला.
कार्यक्रमात विद्यालयाचे सहाय्यक शिक्षक रियाज जमादार यांनी विद्यार्थ्यांना तंबाखूमुक्तीची शपथ दिली. तंबाखू, जर्दा, खर्रा, बिडी, सिगारेट, ई-हुक्का, ई-सिगारेट यांसारख्या व्यसनांपासून दूर राहण्याचा तसेच सार्वजनिक ठिकाणी थुंकण्यामुळे होणाऱ्या आजारांविषयी जनजागृती करण्याचा संकल्प विद्यार्थ्यांनी केला.
यावेळी विद्यार्थ्यांनी आपले घर, शाळा, कार्यालय, गाव आणि परिसर तंबाखूमुक्त ठेवण्यासाठी प्रयत्नशील राहण्याची प्रतिज्ञा केली. तसेच भारत सरकारचा तंबाखू नियंत्रण कायदा २००३ आणि महाराष्ट्र शासनाच्या तंबाखूजन्य पदार्थांवरील प्रतिबंधात्मक निर्णयांची प्रभावी अंमलबजावणी करण्यासाठी जागरूक राहण्याचा निर्धार व्यक्त केला.
क्रीडाश्री अब्दुल कादर देसाई यांनी विद्यार्थ्यांना तंबाखू सेवनाचे दुष्परिणाम समजावून सांगितले. तंबाखूजन्य पदार्थांपासून स्वतः दूर राहून इतरांनाही त्यापासून परावृत्त करण्यासाठी प्रयत्न करण्याचे आवाहन त्यांनी केले.
याच कार्यक्रमात रियाज जमादार यांची शिरोळ तालुका माध्यमिक शिक्षक पतसंस्था, कुरुंदवाड येथे उपसभापतीपदी निवड झाल्याबद्दल विद्यालयाच्या वतीने त्यांचा सत्कार करण्यात आला. मुख्याध्यापिका श्रीमती माणिक नागावे यांच्या हस्ते त्यांना सन्मानित करण्यात आले.
कार्यक्रमाचे सूत्रसंचालन शितल हळींगळे यांनी केले, तर मनोज पासोबा यांनी आभार मानले.
यावेळी पद्मावती घाट, संगीता भोसले, गणेश खिलारे, राजू जमादार, महेश गंगधर, शिक्षकेतर कर्मचारी तसेच विद्यालयातील सर्व विद्यार्थी मोठ्या संख्येने उपस्थित होते.
“तंबाखूमुक्त शाळा, निरोगी समाज” हा संदेश देत कार्यक्रमाची सांगता करण्यात आली.
