कुरुंदवाड | प्रतिनिधी :
जागतिक पर्यावरण दिनानिमित्त नवभारत शिक्षण मंडळ संचलित श्री दत्त कनिष्ठ महाविद्यालय, कुरुंदवाड (ता. शिरोळ) येथे विविध पर्यावरणपूरक उपक्रमांचे आयोजन करण्यात आले. महाविद्यालय परिसरात वृक्षारोपण करून पर्यावरण संवर्धनाचा संदेश देण्यात आला. तसेच स्वच्छता राखण्यात मोलाचे योगदान देणाऱ्या स्वच्छता दूतांचा विशेष सत्कार करण्यात आला.
कार्यक्रमाच्या अध्यक्षस्थानी महाविद्यालयाचे प्राचार्य आर. जे. पाटील होते, तर प्रमुख पाहुणे म्हणून राष्ट्र सेवा दलाचे बाबासाहेब नदाफ उपस्थित होते.
यावेळी मान्यवरांच्या हस्ते वृक्षारोपण करण्यात आले. पर्यावरणाचे संतुलन राखण्यासाठी वृक्षारोपणाबरोबरच वृक्षसंवर्धनाची जबाबदारीही तितकीच महत्त्वाची असल्याचे प्रतिपादन बाबासाहेब नदाफ यांनी केले. वाढते प्रदूषण, हवामान बदल आणि पर्यावरणीय असंतुलनाच्या पार्श्वभूमीवर प्रत्येकाने पर्यावरण रक्षणासाठी पुढाकार घेण्याचे आवाहन त्यांनी केले.
अध्यक्षीय भाषणात प्राचार्य आर. जे. पाटील यांनी विद्यार्थी, शिक्षक आणि कर्मचाऱ्यांनी पर्यावरणपूरक उपक्रमांमध्ये सक्रिय सहभाग घेऊन हरित आणि स्वच्छ परिसर निर्माण करण्यासाठी योगदान द्यावे, असे सांगितले.
कार्यक्रमादरम्यान महाविद्यालयातील शिक्षकेतर कर्मचारी तसेच स्वच्छता दूतांचा प्रशासनाच्या वतीने विशेष सत्कार करण्यात आला. त्यांच्या सेवाभावी कार्याबद्दल कृतज्ञता व्यक्त करण्यात आली.
या उपक्रमास शिक्षकवृंद, शिक्षकेतर कर्मचारी, विद्यार्थी आणि कर्मचारी मोठ्या संख्येने उपस्थित होते. पर्यावरण संवर्धन, स्वच्छता आणि सामाजिक उत्तरदायित्वाचा संदेश देणारा हा कार्यक्रम उत्साहपूर्ण वातावरणात संपन्न झाला.
“वृक्ष लावा, वृक्ष जगवा आणि स्वच्छ पर्यावरण घडवा” हा संदेश देत कार्यक्रमाची सांगता करण्यात आली.
