नांदेड | प्रतिनिधी
महाराष्ट्र राज्य प्राथमिक शिक्षक संघाची यावर्षीची महामंडळ सभा दि. ११ जून रोजी राळेगणसिध्दी येथे होणार असून या निमित्ताने “हक्क परिषद” आयोजित करण्यात आली आहे. या परिषदेसाठी नांदेड जिल्ह्यातील शिक्षकांनी मोठ्या संख्येने उपस्थित राहावे, असे आवाहन जिल्हाध्यक्ष बाबुराव माडगे यांनी केले आहे.
राळेगणसिध्दी येथील स्वर्ग लॉन्समध्ये सकाळी दहा वाजता सभेची सुरुवात होणार आहे. ही सभा शिक्षक नेते संभाजीराव थोरात (तात्या) आणि शिक्षकप्रिय बाळासाहेब मारणे यांच्या नेतृत्वाखाली पार पडणार असल्याची माहितीही त्यांनी दिली.
या सभेत जेष्ठ समाजसेवक पद्मभूषण अण्णा हजारे आणि आदर्श गाव योजनेचे कार्याध्यक्ष पद्मश्री पोपटराव पवार मार्गदर्शन करणार आहेत. देशभरातील विद्यार्थी व शिक्षक सध्या विविध प्रश्नांमुळे अस्वस्थ असल्याचे यावेळी नमूद करण्यात आले.
टीईटी, पदोन्नती, संचमान्यता, ऑनलाइन कामांचा वाढता ताण, गैरसोयीच्या बदल्या आणि रिक्त पदांची समस्या यामुळे सरकारी शाळांपुढे गंभीर आव्हाने निर्माण झाली आहेत. या पार्श्वभूमीवर लोकशाही मार्गाने अर्ज, निवेदने व आंदोलने करूनही प्रश्नांकडे दुर्लक्ष होत असल्याचा आरोप करण्यात आला.
या सर्व प्रश्नांवर अण्णा हजारे व पोपटराव पवार यांच्या मार्गदर्शनाखाली शासनस्तरावर जागृती निर्माण करणे तसेच शिक्षक आंदोलनाची पुढील दिशा निश्चित करणे हा या महामंडळ सभेचा मुख्य उद्देश असल्याचे बाबुराव माडगे यांनी स्पष्ट केले.
