उत्तूर | प्रतिनिधी
चिमणे (ता. आजरा) येथील शेतकरी रमेश चव्हाण यांना शेतात गवत कापत असताना कटर मशीनमुळे गंभीर अपघात झाला. या अपघातात त्यांच्या पायाला गंभीर दुखापत होऊन तो निकामी झाल्याने चव्हाण कुटुंबावर मोठे आर्थिक आणि मानसिक संकट कोसळले आहे.
घरातील कर्त्या व्यक्तीवरच हे संकट ओढवल्याने कुटुंबासमोर अनेक अडचणी निर्माण झाल्या आहेत. या परिस्थितीची दखल घेत सामाजिक बांधिलकी जपत विघ्नहर्ता सोशल फाउंडेशन, उत्तूर यांच्या वतीने रमेश चव्हाण यांच्या कुटुंबाला आर्थिक मदत देण्यात आली.
यावेळी फाउंडेशनच्या पदाधिकाऱ्यांनी सांगितले की, समाजातील गरजू आणि संकटग्रस्त कुटुंबांच्या पाठीशी उभे राहणे ही संस्थेची जबाबदारी आहे. केवळ निधी जमा करणे नव्हे, तर गरजूंना योग्य वेळी आधार देणे हेच संस्थेचे प्रमुख उद्दिष्ट आहे.
“संकटात साथ… माणुसकीचा हात” या भावनेतून फाउंडेशनने चव्हाण कुटुंबाला मदतीचा हात दिला असून, या उपक्रमाचे परिसरात स्वागत होत आहे. संकटाच्या काळात समाजातील विविध घटकांनी एकमेकांच्या मदतीला धावून जाण्याची गरज असल्याचे मतही यावेळी व्यक्त करण्यात आले.
रमेश चव्हाण यांनी या गंभीर संकटातून लवकरात लवकर सावरावे आणि त्यांना उत्तम आरोग्य लाभावे, अशी सदिच्छा विघ्नहर्ता सोशल फाउंडेशनच्या वतीने व्यक्त करण्यात आली.
या सामाजिक उपक्रमाबद्दल फाउंडेशनचे अध्यक्ष, पदाधिकारी व सर्व सदस्यांचे परिसरातून विशेष कौतुक होत आहे. “समाजासाठी… समाजासोबत…” हे ब्रीदवाक्य प्रत्यक्ष कृतीतून साकारत विघ्नहर्ता सोशल फाउंडेशनने पुन्हा एकदा सामाजिक संवेदनशीलतेचा आदर्श निर्माण केला आहे.
