परभणी (प्रतिनिधी)
परभणी महानगरपालिकेच्या वतीने प्रभाग समिती ‘अ’ आणि ‘क’ अंतर्गत कार्यरत स्वच्छता कर्मचाऱ्यांना सुरक्षा साहित्याचे वाटप करण्यात आले. यावेळी शहरातील स्वच्छता व्यवस्था अधिक प्रभावी, सुरक्षित आणि गतिमान करण्यासाठी संबंधित अधिकाऱ्यांना आवश्यक सूचना देण्यात आल्या.
प्रभाग समिती ‘अ’ अंतर्गत आयोजित कार्यक्रमास सभापती रईस खान सरफराज खान, सहाय्यक आयुक्त जुबेर हाश्मी, स्वच्छता निरीक्षक कुणाल भारसाकळे तसेच लक्ष्मण जोगदंड उपस्थित होते.
तर प्रभाग समिती ‘क’च्या कार्यक्रमास सभापती तबस्सुम वसीम शेख, उपायुक्त तुकाराम कदम, नगरसेवक अक्षय देशमुख, आकाश लहाने, विश्वजीत बुधवत, माजी सभापती अतुल सरोदे, रितेश जैन, बबलू टाक, शंकर आजेगावकर, डॉ. केदार खटिंग, डॉ. अनिल कांबळे, नईन भाई, शेख वसीम, अलीम कुरेशी, शरफोद्दीन सिद्दिकी, कलीम बॉस, अलीम काझी, मुख्य स्वच्छता निरीक्षक श्रीकांत कुरा, शेख शादाब, स्वच्छता निरीक्षक प्रल्हाद देशमाने तसेच लक्ष्मण जोगदंड उपस्थित होते.
यावेळी मान्यवरांच्या हस्ते स्वच्छता कर्मचाऱ्यांना हातमोजे, मास्क व अन्य सुरक्षा साहित्याचे वाटप करण्यात आले.
प्रभाग समिती ‘अ’चे सभापती रईस खान सरफराज खान यांनी प्रभाग समितीअंतर्गत येणाऱ्या सर्व कॉलनींमध्ये विशेष स्वच्छता मोहीम राबविण्याच्या सूचना दिल्या. तसेच लहान-मोठ्या नाल्यांची साफसफाई वेळेत पूर्ण करून स्वच्छता कर्मचाऱ्यांकडून नियमितपणे कामे करून घेण्याचे निर्देश दिले. सहाय्यक आयुक्तांनी स्वतः वॉर्डांमध्ये फिरून स्वच्छतेच्या कामांचा आढावा घ्यावा व कामे व्यवस्थित पार पडतील याची दक्षता घ्यावी, असेही त्यांनी नमूद केले.
उपायुक्त तुकाराम कदम यांनी शहरातील विविध भागांमध्ये स्वच्छतेची कामे अधिक वेगाने करण्यासाठी आवश्यकतेनुसार पोकलेन व जेसीबी यंत्रसामग्री उपलब्ध करून दिली जाईल, असे सांगितले. तसेच स्वच्छता कामगारांची संख्या वाढवून शहरातील प्रत्येक भागात प्रभावी स्वच्छता मोहीम राबविण्याच्या सूचना स्वच्छता निरीक्षकांना देण्यात आल्या.
यावेळी शहर स्वच्छ, सुंदर आणि आरोग्यदायी ठेवण्यासाठी स्वच्छता कर्मचाऱ्यांचे योगदान अत्यंत मोलाचे असल्याचे मान्यवरांनी नमूद केले. त्यांना आवश्यक सुरक्षा साहित्य उपलब्ध करून देण्याबरोबरच स्वच्छता व्यवस्थेला अधिक बळकटी देण्यासाठी महानगरपालिका कटिबद्ध असल्याचा विश्वास व्यक्त करण्यात आला.
