मोखाडा | प्रतिनिधी :
विक्रमगड विधानसभा मतदारसंघाचे माजी आमदार तथा सुनील चंद्रकांत भुसारा यांची ठाणे जिल्हा मध्यवर्ती सहकारी बँक च्या संचालकपदी बिनविरोध निवड झाली आहे. त्यांच्या निवडीमुळे विक्रमगड, जव्हार, मोखाडा तसेच पालघर जिल्ह्यातील सहकार क्षेत्रात आनंद आणि समाधान व्यक्त करण्यात येत आहे.
सहकार क्षेत्रातील दीर्घ अनुभव, ग्रामीण भागातील शेतकरी व सर्वसामान्य नागरिकांच्या प्रश्नांची जाण तसेच लोकप्रतिनिधी म्हणून केलेल्या कार्याची दखल घेत त्यांची संचालकपदी निवड झाल्याचे मानले जात आहे. त्यांच्या माध्यमातून बँकेच्या विकासाला चालना मिळण्याबरोबरच ग्रामीण भागातील शेतकरी, महिला बचत गट आणि सहकारी संस्थांना अधिक बळ मिळेल, अशी अपेक्षा व्यक्त केली जात आहे.
सुनील भुसारा यांच्या बिनविरोध निवडीबद्दल कार्यकर्ते, सहकारी संस्थांचे पदाधिकारी तसेच विविध क्षेत्रातील मान्यवरांनी त्यांचे अभिनंदन केले आहे. त्यांच्या निवडीमुळे पालघर जिल्ह्याचे प्रतिनिधित्व बँकेच्या निर्णय प्रक्रियेत अधिक प्रभावीपणे होईल, अशी भावना व्यक्त करण्यात येत आहे.
यावेळी सुनील भुसारा यांनी बँकेच्या माध्यमातून ग्रामीण अर्थव्यवस्था मजबूत करण्यासाठी तसेच शेतकरी आणि सहकार क्षेत्राच्या विकासासाठी कटिबद्ध राहणार असल्याची भावना व्यक्त केली. त्यांच्या निवडीचे सर्व स्तरांतून स्वागत होत असून सहकार क्षेत्राला नवसंजीवनी मिळेल, असा विश्वास व्यक्त केला जात आहे.
वडिलांनंतर तब्बल १६ वर्षांनी संचालकपदी निवड
सुनील भुसारा यांचे वडील चंद्रकांत भुसारा हे २०१२ मध्ये जिल्हा बँकेचे संचालक होते. त्यापूर्वी १९९९ मध्ये त्यांनी उपाध्यक्षपदाची जबाबदारीही सांभाळली होती. त्यांच्या अकाली निधनानंतर सुनील भुसारा यांना अनेकदा या पदासाठी प्रयत्न करूनही संधी मिळाली नव्हती. मात्र, यंदाच्या पंचवार्षिक निवड प्रक्रियेत राजकीय कौशल्य दाखवत त्यांनी बिनविरोध संचालकपद मिळवले आहे.
या निवडीमुळे भुसारा कुटुंबाचा सहकार क्षेत्रातील वारसा पुन्हा एकदा बळकट झाल्याची भावना कार्यकर्त्यांमध्ये व्यक्त होत आहे.
