आजरा | प्रतिनिधी
चंदगड तालुक्यातील तिलारी घाट परिसरात अज्ञात महिलेचा मृतदेह फेकून पुरावा नष्ट करण्याचा प्रयत्न करणाऱ्या अत्यंत गुंतागुंतीच्या हत्येचा छडा लावण्यात कोल्हापूर पोलिसांच्या स्थानिक गुन्हे अन्वेषण शाखेला (एलसीबी) यश आले आहे. या प्रकरणी कर्नाटक राज्यातील तीन आरोपींना अटक करण्यात आली असून, तपास पथकाच्या उल्लेखनीय कामगिरीबद्दल निलोत्पल यांनी ५० हजार रुपयांचे रोख पारितोषिक जाहीर केले आहे.
जंगलात सापडला होता अज्ञात महिलेचा मृतदेह
दि. २९ मे २०२६ रोजी सकाळी चंदगड तालुक्यातील तिलारी घाट परिसरात, कोदाळी-दोडामार्ग मार्गावरील जंगलात मुख्य रस्त्यापासून काही अंतरावर एका ३० ते ३५ वर्षीय अज्ञात महिलेचा मृतदेह आढळून आला होता. सुरुवातीला चंदगड पोलीस ठाणे येथे अकस्मात मृत्यूची नोंद करण्यात आली होती.
शवविच्छेदनातून हत्येचा उलगडा
वैद्यकीय तपासणीत महिलेच्या डोक्याला गंभीर दुखापत झाल्याने तिचा मृत्यू झाल्याचे स्पष्ट झाले. अज्ञात व्यक्तींनी स्टीलच्या शॉक अब्झॉर्बर पाईपसारख्या हत्याराने डोक्यावर वार करून खून केल्याचा संशय व्यक्त करण्यात आला. त्यानंतर अज्ञात आरोपींविरुद्ध खुनाचा गुन्हा दाखल करण्यात आला.
सीसीटीव्ही आणि तांत्रिक तपासातून मिळाला धागा
तपासादरम्यान पोलिसांनी महाराष्ट्र, कर्नाटक आणि गोवा राज्यांतील तब्बल १९९ बेपत्ता महिलांची माहिती तपासली. तसेच परिसरातील सीसीटीव्ही फुटेजचे बारकाईने विश्लेषण करण्यात आले.
तपासात २५ मे रोजी एक संशयास्पद क्रूझर वाहन तिलारी घाटातून अवघ्या २० मिनिटांत परतल्याचे आढळून आले. पुढील तपासात मृत महिला एका मोटारसायकलवरून संशयितासोबत जाताना आणि नंतर क्रूझर वाहनाजवळ पोहोचल्याचे दिसून आले. यानंतर संशयाची सुई बसवराज करणावर याच्याकडे वळली.
शिनोळी परिसरात सापळा रचून अटक
गोपनीय माहितीच्या आधारे एलसीबीच्या पथकाने शिनोळी परिसरात सापळा रचून तीन संशयितांना ताब्यात घेतले. चौकशीदरम्यान त्यांनी गुन्ह्याची कबुली दिली.
अटक आरोपी
- यल्लाप्पा महिलाप्पा करणावर (वय ५७, राजकुदट्री, बेळगाव)
- बसवराज यल्लाप्पा करणावर (वय ३३, राजकुदट्री, बेळगाव)
- लगमाप्पा अंकलगी (वय ३७, कैचनहट्टी, बेळगाव)
आरोपींनी मृत महिलेची ओळख गंगव्वा सत्याप्पा हंचीमणी (वय २५, वंटमुरी, बेळगाव) अशी असल्याचे सांगितले असून तिला तिलारी घाटात आणून खून केल्याची कबुली दिली आहे.
या गुन्ह्याचा तपास सुशांत चव्हाण यांच्या नेतृत्वाखाली करण्यात आला. तसेच अण्णासाहेब जाधव, रामदास इंगवले, निंगाप्पा चौखंडे यांच्यासह एलसीबी आणि चंदगड पोलिसांच्या पथकाने महत्त्वपूर्ण भूमिका बजावली.
अटक आरोपींना पुढील तपासासाठी चंदगड पोलिसांच्या ताब्यात देण्यात आले असून हत्येमागील नेमके कारण शोधण्याचे काम सुरू आहे.
