कन्नड | प्रतिनिधी
संभाजीनगर जिल्ह्यातील “सैनिकांचे गाव” म्हणून ओळख असलेल्या आडगाव भोसले येथील आणखी दोन युवकांची भारतीय सैन्य दलात निवड झाली असून, गावाच्या गौरवशाली सैनिक परंपरेत आणखी एक मानाचा अध्याय जोडला गेला आहे.
गावातील शेतकरी कुटुंबातील विशाल लक्ष्मण भोसले आणि आदित्य ज्ञानेश्वर भोसले यांची भारतीय सैन्य दलाच्या अग्निवीर टेक्निकल ट्रेडमध्ये निवड झाली आहे. त्यांच्या या यशामुळे गावात आनंदाचे वातावरण निर्माण झाले असून ग्रामस्थांकडून त्यांचे कौतुक होत आहे.
या यशाबद्दल आडगाव भोसले येथील आजी-माजी सैनिक, ग्रामस्थ आणि विविध मान्यवरांच्या उपस्थितीत सत्कार समारंभ आयोजित करण्यात आला. यावेळी निवड झालेल्या युवकांचा तसेच त्यांच्या पालकांचा शाल व श्रीफळ देऊन सन्मान करण्यात आला. तसेच छत्रपती शिवाजी महाराजांच्या स्मारकाचे दर्शन व पूजन करून युवकांना शुभेच्छा देण्यात आल्या.
कार्यक्रमात उपस्थित माजी सैनिकांनी आणि ग्रामस्थांनी युवकांच्या यशाचे अभिनंदन करत इतर तरुणांनाही सैन्य सेवेत सहभागी होण्यासाठी प्रेरणा घ्यावी, असे आवाहन केले. माजी सैनिक संघटनेच्या वतीनेही दोन्ही युवकांचा विशेष गौरव करण्यात आला.
यावेळी गावातील माजी सैनिक, नागरिक, ग्रामपंचायत पदाधिकारी आणि ग्रामस्थ मोठ्या संख्येने उपस्थित होते.
कार्यक्रमात बोलताना उपसरपंच राजेंद्र सुखदेव भोसले यांनी, “आमच्या गावातील तरुणांचा आम्हाला अभिमान आहे. गावातील युवकांनी देशसेवेची परंपरा अशीच अखंडपणे पुढे चालू ठेवावी,” असे मनोगत व्यक्त केले.
विशाल भोसले आणि आदित्य भोसले यांच्या निवडीमुळे आडगाव भोसले गावाची सैनिक परंपरा अधिक बळकट झाली असून त्यांच्या पुढील कारकिर्दीसाठी सर्व स्तरांतून शुभेच्छांचा वर्षाव होत आहे.
