प्रवेशापूर्वी शाळेची शासनमान्यता व यू-डायस क्रमांक तपासण्याचे पालकांना आवाहन
पाथरी | प्रतिनिधी
नवीन शैक्षणिक वर्षाच्या पार्श्वभूमीवर पालकांनी आपल्या पाल्यांचा प्रवेश घेताना विशेष काळजी घ्यावी आणि केवळ शासनमान्यता प्राप्त तसेच अधिकृत यू-डायस (UDISE) क्रमांक असलेल्या शाळांमध्येच प्रवेश द्यावा, असे आवाहन पाथरी पंचायत समितीचे गट शिक्षणाधिकारी एम. बी. राठोड यांनी केले आहे.
प्रसिद्धीपत्रकाद्वारे माहिती देताना राठोड यांनी सांगितले की, काही संस्था आवश्यक परवानग्या व शासनमान्यता न घेता शाळा अथवा वर्ग सुरू करत असल्याच्या घटना निदर्शनास येत आहेत. अशा अनधिकृत शैक्षणिक संस्थांमध्ये शिक्षण घेणाऱ्या विद्यार्थ्यांच्या शैक्षणिक भवितव्यावर विपरीत परिणाम होऊ शकतो.
पुढील शिक्षण, शिष्यवृत्ती, शैक्षणिक नोंदी, प्रमाणपत्रे आणि इतर प्रशासकीय प्रक्रियांमध्ये अडचणी निर्माण होण्याची शक्यता असल्याने पालकांनी कोणत्याही प्रकारच्या आकर्षक जाहिराती किंवा भुलथापांना बळी पडू नये, असेही त्यांनी स्पष्ट केले.
पाथरी तालुक्यातील शासनमान्य शाळा आणि शासनाची मंजुरी प्राप्त संस्थांची अधिकृत यादी पंचायत समिती पाथरी येथील गट शिक्षणाधिकारी कार्यालयाच्या नोटीस बोर्डावर उपलब्ध करण्यात आली आहे. पालकांनी प्रवेश निश्चित करण्यापूर्वी संबंधित शाळेची शासनमान्यता, यू-डायस क्रमांक आणि आवश्यक कागदपत्रांची पडताळणी करावी, असे आवाहन करण्यात आले आहे.
विद्यार्थ्यांच्या उज्ज्वल भविष्यासाठी प्रवेश प्रक्रियेदरम्यान सर्व बाबींची खातरजमा करणे आवश्यक असल्याचे शिक्षण विभागाने नमूद केले आहे. तसेच ज्या संस्था शासनमान्य नाहीत, यू-डायस अथवा यूआयडी क्रमांक नसताना शिक्षण देत आहेत किंवा पालकांकडून अवाजवी शुल्क आकारत आहेत, अशा संस्थांविरोधात नियमानुसार कठोर कारवाई करण्यात येईल, असा इशाराही गट शिक्षणाधिकारी एम. बी. राठोड यांनी दिला आहे.
दरम्यान, शिक्षण विभागाच्या या आवाहनामुळे पालकांनी आपल्या पाल्यांच्या प्रवेशाबाबत घाई न करता संबंधित शाळेची अधिकृत माहिती तपासूनच निर्णय घ्यावा, असे पुन्हा एकदा स्पष्ट करण्यात आले आहे.
“शासनमान्य शाळा, अधिकृत यू-डायस क्रमांक आणि आवश्यक परवानग्यांची खातरजमा करूनच प्रवेश घ्या; विद्यार्थ्यांच्या भवितव्याशी तडजोड करू नका,” असे आवाहन शिक्षण विभागाकडून करण्यात आले आहे.
