धुळे | प्रतिनिधी
रक्तदानाविषयी जनजागृती होणे ही काळाची गरज असून, समाजाप्रती दायित्वाची भावना आणि सामाजिक बांधिलकी जपण्याचे प्रभावी माध्यम म्हणून रक्तदानाकडे पाहिले जाते. याच भावनेतून धुळे जिल्हा परिषद अंतर्गत प्राथमिक शाळेत कार्यरत असलेले शिक्षक निलेश ठोके यांनी नियमित रक्तदानाचा संकल्प जपत समाजापुढे एक प्रेरणादायी आदर्श निर्माण केला आहे.
नुकतेच मुंबईतील छत्रपती शिवाजी महाराज टर्मिनस (सीएसएमटी) येथे लोकमान्य टिळक महानगरपालिका सर्वसाधारण रुग्णालय व वैद्यकीय महाविद्यालय, सायन आणि बृहन्मुंबई महानगरपालिका यांच्या संयुक्त विद्यमाने भव्य रक्तदान शिबिराचे आयोजन करण्यात आले होते. या शिबिरात देशभरातील शेकडो रक्तदात्यांनी स्वेच्छेने रक्तदान केले. यामध्ये शिक्षक निलेश ठोके यांनीही स्वयंप्रेरणेने सहभागी होत आपला वार्षिक रक्तदानाचा संकल्प पूर्ण केला.
विशेष म्हणजे, राज्यस्तरीय योगासन स्पर्धेत नाशिक विभागाचे प्रतिनिधित्व करणारे निलेश ठोके हे नांदेड येथे रक्तदान करणारे राज्यातील एकमेव प्राथमिक शिक्षक ठरले आहेत. शिक्षण सेवेत रुजू होण्यापूर्वीपासूनच ते रक्तदान, अवयवदान आणि सामाजिक जनजागृतीसाठी सातत्याने कार्यरत आहेत.
रक्तदान केल्याबद्दल त्यांचा डॉ. पल्लवी आणि डॉ. रीथ जॉन यांच्या हस्ते प्रमाणपत्र देऊन गौरव करण्यात आला. समाजात रक्तदानाबाबत जागरूकता निर्माण व्हावी, अधिकाधिक लोकांनी रक्तदान करावे आणि गरजू रुग्णांना वेळेवर रक्त उपलब्ध व्हावे, यासाठी ते सातत्याने प्रयत्नशील आहेत.
निलेश ठोके यांनी शिक्षणासोबतच क्रीडा, योग, पर्यावरण संवर्धन आणि सामाजिक उपक्रमांमध्येही उल्लेखनीय योगदान दिले आहे. यावर्षी धुळे जिल्हा परिषद आयोजित कला-क्रीडा उत्सवात आरोग्य जनजागृती करणाऱ्या योगनृत्य सादरीकरणासाठी त्यांनी प्रथम क्रमांक पटकावला. यासाठी त्यांचा अतिरिक्त मुख्य कार्यकारी अधिकारी राजेश इंगळे यांच्या हस्ते सन्मान करण्यात आला.
तसेच जलयुक्त शिवार अभियान, पर्यावरण संवर्धन आणि विविध सामाजिक उपक्रमांमध्येही त्यांचा सक्रिय सहभाग राहिला आहे. सीएसएमटी येथे 26/11 दहशतवादी हल्ल्यात निष्पाप नागरिकांनी प्राण गमावलेल्या ठिकाणी जाऊन रक्तदान करण्याची त्यांची कृती ही त्या हल्ल्यातील हुतात्म्यांना वाहिलेली एक अनोखी श्रद्धांजली मानली जात आहे.
“रक्तदान हेच सर्वश्रेष्ठ दान” हा संदेश समाजात रुजविण्यासाठी निलेश ठोके सातत्याने प्रयत्न करत असून त्यांचे कार्य युवकांसाठी प्रेरणादायी ठरत आहे. सोशल मीडियाच्या आहारी गेलेल्या आणि विविध सामाजिक समस्यांशी झुंजणाऱ्या तरुण पिढीसमोर सामाजिक बांधिलकीचा आदर्श निर्माण करणारा हा उपक्रम निश्चितच कौतुकास्पद मानला जात आहे.
शांतीलाल मुथा फाउंडेशनच्या मूल्यवर्धन प्रकल्पाचे जिल्हा समन्वयक परवेज खाटीक आणि तालुका समन्वयक राजेंद्र पगारे यांनीही निलेश ठोके यांच्या रक्तदान विषयक कार्याचे कौतुक करून त्यांचे अभिनंदन केले आहे. त्यांच्या या सामाजिक उपक्रमामुळे समाजात रक्तदानाबाबत सकारात्मक संदेश पोहोचत असून अधिकाधिक लोक रक्तदानासाठी पुढे येतील, अशी अपेक्षा व्यक्त केली जात आहे.
