कन्नड | प्रतिनिधी :
कन्नड तालुक्यातील हतनुर येथे माहेरी आलेल्या एका २४ वर्षीय विवाहित तरुणीने गळफास घेऊन आत्महत्या केल्याची घटना समोर आली आहे. या घटनेमुळे परिसरात खळबळ उडाली असून कुटुंबीयांनी सासरच्या मंडळींकडून होत असलेल्या कथित छळामुळे आत्महत्या केल्याचा आरोप केला आहे.
मृत तरुणीचे नाव पूजा उत्कर्ष गोटे (वय २४) असे आहे. ही घटना १२ जून रोजी सकाळी सुमारे ११ वाजण्याच्या सुमारास उघडकीस आली.
याप्रकरणी पूजाचे वडील प्रभाकर रतन मोहिते यांनी दिलेल्या फिर्यादीवरून तिचा पती उत्कर्ष गोटे, सासरे दिगंबर गोटे आणि सासू रंजना गोटे (रा. शिरेगाव, ता. गंगापूर) यांच्याविरुद्ध गुन्हा दाखल करण्यात आला आहे.
फिर्यादीनुसार, पूजा हिचा विवाह साडेतीन वर्षांपूर्वी उत्कर्ष गोटे यांच्याशी झाला होता. विवाहानंतर तिला किरकोळ कारणांवरून टोमणे मारणे, शिवीगाळ करणे आणि मानसिक त्रास देणे सुरू होते. नवीन घर बांधण्यासाठी १ लाख २० हजार रुपये, भांडी व दागिने आणण्याची मागणी करण्यात येत असल्याचा आरोप करण्यात आला आहे.
तसेच गर्भधारणेदरम्यान वैद्यकीय खर्चासाठी माहेरहून पैसे आणण्याचा दबाव टाकण्यात येत होता. पैसे न आणल्यास शिवीगाळ, मारहाण आणि उपाशी ठेवण्यासारखा छळ केल्याचा आरोप फिर्यादीत करण्यात आला आहे.
या कथित मानसिक व शारीरिक छळामुळे पूजा गोटे हिने आत्महत्या केल्याचे फिर्यादीत नमूद करण्यात आले आहे.
या प्रकरणी कन्नड ग्रामीण पोलीस ठाण्यात भारतीय न्याय संहिता (BNS) कलम ८८, ८५, १०८, ११५(२), ३५२ व ३(५) अन्वये गुन्हा दाखल करण्यात आला आहे.
प्रकरणाचा पुढील तपास सहायक पोलीस निरीक्षक नारायण गीते यांच्या मार्गदर्शनाखाली पोलीस उपनिरीक्षक मुंढे करीत आहेत.
