भोर | प्रतिनिधी :
भोर तालुक्यातील दुर्गम व डोंगरी भागातील गरजू, होतकरू आणि गुणवंत विद्यार्थ्यांना शैक्षणिक मदत करण्याच्या उद्देशाने वही, पेन आणि दप्तर वाटप कार्यक्रमाचे आयोजन करण्यात आले.
रविवार, दि. १४ जून २०२६ रोजी नांदगाव (ता. भोर, जि. पुणे) येथील विहारामध्ये भोर तालुका बौद्धजन संघ, पुणे आणि भारतीय बौद्धजन विकास समिती, पिंपरी-चिंचवड यांच्या संयुक्त विद्यमाने हा उपक्रम राबविण्यात आला.
या कार्यक्रमात भोर तालुक्यातील दुर्गम, डोंगरी भागातील हुशार व होतकरू विद्यार्थ्यांना वही, पेन आणि दप्तरांचे वितरण करण्यात आले. शैक्षणिक साहित्य मिळाल्याने विद्यार्थ्यांमध्ये आनंदाचे वातावरण निर्माण झाले.
कार्यक्रमास भोर तालुका बौद्धजन संघ, पुणे तसेच भारतीय बौद्धजन विकास समिती, पिंपरी-चिंचवडचे पदाधिकारी उपस्थित होते. याशिवाय नांदगाव, आपटी, निगुडघर, म्हसर आणि परिसरातील विविध सामाजिक, धार्मिक व राजकीय क्षेत्रात कार्यरत असलेले कार्यकर्तेही मोठ्या संख्येने सहभागी झाले.
या उपक्रमाच्या यशस्वी आयोजनासाठी स्थानिक नागरिक, कार्यकर्ते तसेच भोर तालुका बौद्धजन संघ, भोर यांचे मोलाचे सहकार्य लाभले. कार्यक्रमाच्या शेवटी आयोजकांनी सर्व सहकाऱ्यांचे मनःपूर्वक आभार मानले.
शैक्षणिक साहित्याच्या माध्यमातून ग्रामीण व दुर्गम भागातील विद्यार्थ्यांना शिक्षणासाठी प्रोत्साहन देण्याचा हा उपक्रम कौतुकास्पद असल्याची भावना उपस्थितांनी व्यक्त केली.
