छत्रपती संभाजीनगर | प्रतिनिधी :
कन्नड तालुक्यातील हतनुर येथे विहिरीत पडून एका ३७ वर्षीय तरुणाचा दुर्दैवी मृत्यू झाल्याची घटना घडली आहे. या घटनेमुळे हतनुर गावासह परिसरात हळहळ व्यक्त केली जात आहे.
मृत व्यक्तीचे नाव किशोर भावराव काळे (वय ३७) असे आहे. मिळालेल्या माहितीनुसार, हतनुर शिवारातील (गट क्र. १३८) स्वतःच्या शेतामध्ये खराब झालेला विद्युत पंप विहिरीतून बाहेर काढण्याचे काम सुरू होते. यावेळी अचानक पाय घसरल्याने किशोर काळे विहिरीत पडले.
घटनेवेळी त्यांचा मुलगा त्यांच्यासोबत होता. वडील विहिरीत पडल्याचे लक्षात येताच त्याने आरडाओरड केल्याने आसपासच्या शेतकऱ्यांनी घटनास्थळी धाव घेतली आणि किशोर काळे यांना विहिरीतून बाहेर काढले.
त्यानंतर त्यांना तातडीने कन्नड ग्रामीण रुग्णालयात उपचारासाठी दाखल करण्यात आले. मात्र वैद्यकीय अधिकारी डॉ. शुभम राजपूत यांनी तपासणी करून त्यांना मृत घोषित केले. यावेळी परिचारिका राठोड आणि सावंत उपस्थित होत्या.
मृतदेह शवविच्छेदनासाठी पाठविण्यात आला असून या प्रकरणी कन्नड ग्रामीण पोलीस ठाण्यात आकस्मिक मृत्यूची नोंद करण्यात आली आहे. सहायक पोलीस निरीक्षक नारायण गीते यांच्या मार्गदर्शनाखाली हेड कॉन्स्टेबल कैलास गिते पुढील तपास करीत आहेत.
किशोर काळे यांच्या पश्चात पत्नी आणि दोन मुले असा परिवार आहे. त्यांच्या अकाली निधनामुळे हतनुर गावावर शोककळा पसरली आहे.
