धडगाव | प्रतिनिधी
अक्कलकुवा तालुक्यातील ग्रामपंचायत पिंपळखुटा अंतर्गत येणाऱ्या मोठा तोलवापाडा, पाडावपाडा, टांगबारीपाडा, बेजपाडा, सापरीपाडा, बनखेतपाडा आणि पाटीलपाडा येथील मूलभूत सुविधांच्या मागण्यांसाठी बिरसा फायटर्स नंदुरबार संघटनेने जिल्हाधिकारी व जिल्हा परिषदेचे मुख्य कार्यकारी अधिकारी यांना निवेदन सादर केले.
निवेदनामध्ये जलजीवन मिशनअंतर्गत पिण्याच्या पाण्याची व्यवस्था करणे, पिंपळखुटा ते मोठा तोलवापाडा तसेच बर्डी आश्रमशाळा ते टांगबारीपाडा रस्त्यांचे खडीकरण व डांबरीकरण करणे, वीजपुरवठा सुरू करणे, रस्त्यालगत पथदिवे बसविणे, जिल्हा परिषद शाळा व अंगणवाडी सुरू करणे, आशा सेविकांची नियुक्ती करणे, आरोग्य सुविधा उपलब्ध करून देणे तसेच स्तनदा मातांना मातृ वंदना योजनेचा लाभ देण्याची मागणी करण्यात आली आहे.
संघटनेच्या म्हणण्यानुसार, या दुर्गम पाड्यांमध्ये सुमारे ३,५०० आदिवासी नागरिक वास्तव्यास आहेत. पिण्याच्या पाण्यासाठी आजही नागरिकांना मोठी पायपीट करावी लागते. अनेकांना घाट उतरून व नदी ओलांडून मुख्य रस्त्यापर्यंत जावे लागते. परिसरातील विद्यार्थी बर्डी आश्रमशाळेत शिक्षण घेत असून त्यांना दररोज धोकादायक मार्गाने प्रवास करावा लागतो.
रस्त्यांच्या अभावामुळे आरोग्य सेवांपर्यंत पोहोचण्यात अडचणी निर्माण होत असल्याचा दावा निवेदनात करण्यात आला आहे. त्यामुळे पाणी, रस्ता, वीज, शिक्षण, अंगणवाडी व आरोग्य सुविधा तातडीने उपलब्ध करून देण्याची मागणी संघटनेने प्रशासनाकडे केली आहे.
यावेळी अक्कलकुवा तालुका अध्यक्ष दिनेश वसावे, गुलाबसिंग वसावे, जेवंती वसावे, निलेश वळवी, अश्विन तडवी यांच्यासह संघटनेचे पदाधिकारी व कार्यकर्ते उपस्थित होते.
