कुरुंदवाड | प्रतिनिधी :
नृसिंहवाडी येथे अमावास्येनिमित्त श्री दत्त दर्शनासाठी आलेल्या इचलकरंजी येथील एका तरुणाचा कृष्णा नदीत बुडून दुर्दैवी मृत्यू झाल्याची हृदयद्रावक घटना आज पहाटे घडली. बुडणाऱ्या आपल्या सहकाऱ्याला वाचविण्यासाठी नदीत उडी घेतलेल्या या तरुणाला स्वतःचे प्राण गमवावे लागले. राम कुशलराम (रा. कापड मार्केट, इचलकरंजी, मूळ गाव राजस्थान) असे मृत तरुणाचे नाव आहे.
मिळालेल्या माहितीनुसार, अमावास्येनिमित्त नृसिंहवाडीत भाविकांची मोठी गर्दी झाली होती. इचलकरंजी येथून आलेले राम कुशलराम हे आज पहाटे सुमारे ५ वाजण्याच्या सुमारास कृष्णा नदीवर स्नानासाठी गेले होते. त्यावेळी त्यांचा एक सहकारी नदीच्या पाण्यात अडचणीत सापडल्याचे त्यांच्या लक्षात आले. त्याला मदत करण्यासाठी राम यांनी तात्काळ नदीत उडी घेतली.
राम यांनी आपल्या सहकाऱ्याला सुरक्षित बाहेर काढण्यात यश मिळवले. मात्र, नदीतील पाण्याचा अंदाज न आल्याने ते स्वतः खोल पाण्यात अडकले आणि बुडाले. या घटनेमुळे परिसरात एकच खळबळ उडाली.
घटनेची माहिती मिळताच आपत्ती व्यवस्थापनात कार्यरत वजीर रेस्क्यू फोर्सच्या पथकाने तत्काळ घटनास्थळी धाव घेतली. सकाळी ६ वाजल्यापासून नदीपात्रात शोधमोहीम सुरू करण्यात आली. सुमारे अडीच तासांच्या अथक प्रयत्नांनंतर सकाळी ८.३० वाजता राम कुशलराम यांचा मृतदेह शोधण्यात रेस्क्यू पथकाला यश आले.
मृतदेह नदीबाहेर काढून पुढील कायदेशीर प्रक्रिया पूर्ण करण्यासाठी पोलिसांच्या ताब्यात देण्यात आला. या दुर्दैवी घटनेमुळे नृसिंहवाडी परिसरात तसेच इचलकरंजी येथे हळहळ व्यक्त केली जात असून, सहकाऱ्याचे प्राण वाचवताना स्वतःचा जीव गमावलेल्या राम कुशलराम यांच्या धाडसाला सर्व स्तरातून श्रद्धांजली वाहण्यात येत आहे.
