पारोळा | प्रतिनिधी
न्यू पीपल्स एज्युकेशन सोसायटी संचलित आदर्श माध्यमिक विद्यालय, व्यंकटेश नगर, पारोळा येथे नवीन शैक्षणिक वर्षाच्या प्रारंभी शाळा प्रवेशोत्सव उत्साहपूर्ण वातावरणात साजरा करण्यात आला.
या कार्यक्रमाच्या अध्यक्षस्थानी संस्थेचे चेअरमन डॉ. शांताराम दाजीबा पाटील उपस्थित होते. प्रवेशोत्सवानिमित्त शाळेत आलेल्या विद्यार्थ्यांची ढोल-ताशांच्या गजरात भव्य रॅली काढण्यात आली. संपूर्ण परिसर विद्यार्थ्यांच्या उत्साहाने आणि जल्लोषाने गजबजून गेला होता.
यानंतर इयत्ता पाचवीत नव्याने प्रवेश घेतलेल्या विद्यार्थ्यांचे औक्षण करून त्यांचे पुष्पगुच्छ देत स्वागत करण्यात आले. शाळेच्या पहिल्याच दिवशी इयत्ता पाचवी ते आठवीच्या विद्यार्थ्यांना मोफत पाठ्यपुस्तकांचे वाटप करण्यात आले.
यावेळी विद्यार्थ्यांना नियमित शिक्षण, शिस्त आणि गुणवत्तापूर्ण अभ्यासाचे महत्त्व पटवून देण्यात आले. नवीन शैक्षणिक वर्षाची सुरुवात आनंददायी आणि प्रेरणादायी वातावरणात व्हावी यासाठी शाळा प्रशासनाने विशेष नियोजन केले होते.
या कार्यक्रमाला शाळेचे मुख्याध्यापक डी. बी. पाटील, सर्व शिक्षक व शिक्षकेतर कर्मचारी, विद्यार्थी, पालक आणि मान्यवर मोठ्या संख्येने उपस्थित होते. विद्यार्थ्यांच्या उत्स्फूर्त सहभागामुळे प्रवेशोत्सव कार्यक्रम उत्साहात पार पडला.
