कुरुंदवाड | प्रतिनिधी :
मोहरम हा श्रद्धा, त्याग आणि धार्मिक एकतेचा संदेश देणारा हिंदू-मुस्लिम बांधवांचा सण असून, भाविकांनी शांतता, शिस्त आणि कायद्याच्या चौकटीत राहून मोहरम सण साजरा करावा, असे आवाहन पीर-पंजा कमिटीचे अध्यक्ष शकील गुलाब गरगरे यांनी केले.
कुरुंदवाड येथील बैरागदार मशिदीत सोमवारी सायंकाळी मोहरम सणाच्या नियोजनासाठी बैठकीचे आयोजन करण्यात आले होते. यावेळी मोहरम उत्सवाची कार्यक्रम पत्रिका जाहीर करण्यात आली तसेच विविध धार्मिक कार्यक्रमांची रूपरेषा निश्चित करण्यात आली.
यावेळी बोलताना शकील गरगरे यांनी शहरातील सर्व मशिदी, धार्मिक संस्था आणि पीर कमिट्यांनी परस्पर समन्वय ठेवून सण साजरा करावा, तसेच कायदा व सुव्यवस्था अबाधित राखण्यासाठी प्रशासनाला सहकार्य करावे, असे आवाहन केले.
मोहरम काळात भाविकांची वाढती उपस्थिती लक्षात घेऊन प्रत्येक मशिद कमिटीने पिण्याचे पाणी, स्वच्छता, प्रकाश व्यवस्था, वैद्यकीय मदत आणि इतर आवश्यक सुविधा उपलब्ध करून देण्याचा निर्णय बैठकीत घेण्यात आला.
मोहरम कार्यक्रमाचे नियोजन :
- १६ जून – कुदळविधी
- १७ जूनपासून – पहिली ते दहावी धार्मिक परंपरा
- २१ जून – पाचवी व पीर प्रतिष्ठापना
- २३ जून – सातवी, पीरांच्या पहिल्या भेटी
- २४ जून – आठवी, पीरांच्या दुसऱ्या दिवसाच्या भेटी
- २५ जून – नववी खतल रात्र
- २६ जून – दहावी व पीर/ताबूत विसर्जन
- २८ जून – चिरमुरे जारत/जारता कार्यक्रमाने उत्सवाची सांगता
यावेळी नागेश घाटगे, अजित पाटील, जहांगीर जमादार, करीम मकानदार, बापूसाहेब असंगे यांनी मनोगते व्यक्त केली.
बैठकीस मज्जिद गोदड, हरिबा शेडबाळे, नासिर आंबी, दस्तगीर अपराध, फारुख जमादार, सादिक दबासे, चंद्रकांत घडसे, सचिन अडसूळ, शब्बीर मतापे, मेहबूब मोमीन, जंग मोमीन, मुस्तफा मुल्ला यांच्यासह शहरातील विविध पीर-पंजा कमिटीचे पदाधिकारी व नागरिक मोठ्या संख्येने उपस्थित होते.
