मळद (दौंड) : प्रतिनिधी
मळद ग्रामपंचायत सार्वत्रिक निवडणुकीच्या पार्श्वभूमीवर प्रभागनिहाय आरक्षण निश्चित करण्यासाठी दिनांक १२ जून २०२६ रोजी विशेष ग्रामसभेचे आयोजन करण्यात आले होते. ग्रामपंचायत कार्यालयात दुपारी २ वाजता पार पडलेल्या या सभेत शासनाच्या नियमानुसार रोटेशन पद्धतीने आरक्षण जाहीर करण्यात आले.
या विशेष ग्रामसभेच्या अध्यक्षस्थानी दौंड पंचायत समितीचे शाखा अभियंता श्री. आशिष कुंजीर हे होते. तसेच मळदचे ग्राम महसूल अधिकारी श्री. शिवाजी बिराजदार आणि ग्रामपंचायत अधिकारी श्री. संतोष सकट यांची प्रमुख उपस्थिती होती. आरक्षण प्रक्रियेदरम्यान ग्रामस्थांनी मोठ्या संख्येने उपस्थित राहून सहभाग नोंदविला.
ग्रामसभेत विविध प्रभागांसाठी आरक्षण सोडत पारदर्शक पद्धतीने पार पडली. यावेळी उपस्थित ग्रामस्थांना आरक्षण प्रक्रियेची सविस्तर माहिती देण्यात आली.
हरकती व तक्रारींसाठी मुदत जाहीर
जाहीर करण्यात आलेल्या आरक्षण प्रक्रियेबाबत कोणाला हरकत अथवा तक्रार असल्यास शासन निर्णयानुसार मुदत देण्यात आली आहे. इच्छुक नागरिकांनी आपल्या लेखी हरकती दिनांक १९ जून २०२६ ते २५ जून २०२६ या कालावधीत मा. तहसीलदार, दौंड यांच्याकडे सादर कराव्यात, असे प्रशासनाकडून स्पष्ट करण्यात आले आहे.
ग्रामपंचायत निवडणुकीच्या अनुषंगाने झालेल्या या प्रक्रियेमुळे गावातील राजकीय वातावरणात चांगलीच उत्सुकता निर्माण झाली असून, आगामी निवडणुकांकडे ग्रामस्थांचे लक्ष लागले आहे.
