अक्कलकोट ता. | प्रतिनिधी
अक्कलकोट तालुक्यातील दुधनी जिल्हा परिषद प्राथमिक मराठी केंद्र शाळेत शैक्षणिक वर्ष २०२६-२७ निमित्त इयत्ता पहिलीत प्रवेश घेणाऱ्या नवागत विद्यार्थ्यांचा प्रवेशोत्सव कार्यक्रम अत्यंत उत्साहपूर्ण वातावरणात संपन्न झाला.
कार्यक्रमाच्या प्रारंभी क्रांतीज्योती सावित्रीबाई फुले यांच्या प्रतिमेचे पूजन मान्यवरांच्या हस्ते करण्यात आले.
इयत्ता पहिलीत प्रवेश घेणाऱ्या चिमुकल्यांसाठी आकर्षक पद्धतीने सजवलेल्या ट्रॅक्टरमधून गावात प्रभातफेरी काढण्यात आली. या अनोख्या स्वागत सोहळ्यामुळे संपूर्ण गावात आनंदाचे वातावरण निर्माण झाले.
या कार्यक्रमाला पंचायत समिती अक्कलकोटच्या नूतन सदस्या श्रीमती संगीता शिवानंद पाटील आणि श्री शिवानंद पाटील यांची प्रमुख उपस्थिती लाभली. तसेच शाळा व्यवस्थापन समितीचे अध्यक्ष श्री हणमंत कलशेट्टी, उपाध्यक्ष श्री राजेंद्र इंगळे, शिक्षणतज्ज्ञ तथा रिपाइं सोलापूर जिल्हा उपाध्यक्ष सैदप्पा झळकी, सदस्य श्री उमाकांत आळंद, श्री मिहिदीमिया जिडगे, श्री दाऊद नदाफ यांच्यासह अनेक मान्यवर उपस्थित होते.
यावेळी उपस्थित मान्यवरांच्या शुभहस्ते नवागत विद्यार्थ्यांच्या पावलांचे ठसे घेऊन त्यांच्या शैक्षणिक प्रवासाचा मंगल प्रारंभ करण्यात आला. तसेच सर्व विद्यार्थ्यांना मोफत पाठ्यपुस्तके, गणवेश आणि इतर शैक्षणिक साहित्याचे वाटप करण्यात आले. कार्यक्रमाच्या शेवटी विद्यार्थ्यांना खाऊचेही वितरण करण्यात आले.
कार्यक्रमाचे प्रास्ताविक मुख्याध्यापक श्री पोमू राठोड यांनी केले. सूत्रसंचालन श्री रविकुमार कोरचगाव आणि श्री सुहास पवार यांनी केले.
हा कार्यक्रम यशस्वी करण्यासाठी श्री संजीवकुमार बेण्णीसुर आणि श्रीमती शोभा म्हेत्रे यांनी विशेष परिश्रम घेतले. शेवटी श्रीमती अंजली गुंजोटी यांनी उपस्थितांचे आभार मानले.
