प्रतिनिधी
अमळनेर : अमळनेर येथील रेल्वे स्थानक परिसरात मध्यरात्रीच्या सुमारास धक्कादायक घटना घडली. रेल्वे संरक्षण दलातील (RPF) जवान जयपाल सिंह यांनी स्वतःच्या डोक्यात गोळी झाडून आत्महत्येचा प्रयत्न केल्याची माहिती समोर आली आहे.
प्राथमिक माहितीनुसार, ही घटना रेल्वे स्थानकातील आरपीएफ कार्यालयात रात्री १२ ते १ वाजण्याच्या दरम्यान घडली. संबंधित जवानाने शासकीय शस्त्रातून स्वतःवर गोळी झाडल्याने ते गंभीर जखमी झाले.
घटनेची माहिती मिळताच रेल्वे प्रशासन आणि सुरक्षा यंत्रणा तातडीने घटनास्थळी दाखल झाली. जखमी जवानाला त्वरित उपचारासाठी रुग्णालयात दाखल करण्यात आले. प्राथमिक उपचारानंतर त्यांची प्रकृती अत्यंत गंभीर असल्याने पुढील उपचारासाठी धुळे येथे हलविण्यात आले आहे.
या संपूर्ण उपचार प्रक्रियेत डॉ. अनिल शिंदे यांनी महत्त्वाची भूमिका बजावल्याची माहिती मिळत आहे.
दरम्यान, या घटनेमुळे रेल्वे स्थानक परिसरात मोठी खळबळ उडाली असून, आत्महत्येच्या प्रयत्नामागील नेमके कारण अद्याप स्पष्ट झालेले नाही. संबंधित प्रकरणाचा पुढील तपास सुरू आहे.
