भोर प्रतिनिधी
राजगड पोलीस ठाण्याचे नवनियुक्त पोलीस निरीक्षक संतोष जाधव यांनी पदभार स्वीकारल्यानंतर कायदा व सुव्यवस्था अधिक मजबूत करण्यासाठी विविध महत्त्वाच्या विषयांवर लक्ष केंद्रित करण्यात येणार असल्याचे स्पष्ट केले आहे.
यावेळी बोलताना त्यांनी राजगड पोलीस ठाण्याच्या हद्दीत कोणत्याही प्रकारचे अवैध धंदे चालू दिले जाणार नाहीत, असा इशारा दिला. बेकायदेशीर व्यवसाय आणि गुन्हेगारी प्रवृत्तींवर कठोर कारवाई करण्यात येणार असल्याचे त्यांनी सांगितले.
गावागावांत सीसीटीव्ही यंत्रणेचा विस्तार करण्यावर विशेष भर देण्यात येणार असून, त्यामुळे गुन्हेगारीवर नियंत्रण ठेवण्यास मदत होईल, असे त्यांनी नमूद केले.
तसेच पोलीस ठाण्याच्या हद्दीतील भाडेकरूंची पडताळणी करणे आणि कंपन्यांमध्ये कार्यरत परप्रांतीय कामगारांची माहिती पोलिसांना देणे बंधनकारक करण्यात आले आहे. आवश्यक माहिती न देणाऱ्यांविरोधात भारतीय दंड संहितेच्या कलम १८८ अंतर्गत गुन्हे दाखल करण्यात येतील, असा इशाराही त्यांनी दिला.
सायबर गुन्हे, पॉक्सो कायद्याबाबत जनजागृती आणि महिला व बालकांच्या सुरक्षेसंदर्भात विशेष मोहिमा राबविण्यात येणार असल्याचेही त्यांनी स्पष्ट केले.
गुंड प्रवृत्तीला आळा घालून नागरिकांमध्ये सुरक्षिततेची भावना निर्माण करण्यासाठी पोलीस प्रशासन कटिबद्ध असल्याचा निर्धार पीआय संतोष जाधव यांनी व्यक्त केला.
