सेलू प्रतिनिधी :
हिंगणी येथील यशवंत विद्यालयात दि. १४ जून २०२६ रोजी रोटरी क्लब होरायझन नागपूर यांच्या वतीने विद्यार्थ्यांना सायकल वाटप कार्यक्रम उत्साहात संपन्न झाला. ग्रामीण भागातील विद्यार्थ्यांना शिक्षणासाठी प्रोत्साहन मिळावे आणि शाळेत ये-जा करणे सुलभ व्हावे, या उद्देशाने हा उपक्रम राबविण्यात आला.
कार्यक्रमाच्या अध्यक्षस्थानी शाळेचे मुख्याध्यापक मा. श्री. नंदकिशोर ठाकरे सर होते. प्रमुख पाहुणे म्हणून रोटरी क्लबचे अध्यक्ष डॉ. मुंगळकर, सचिव डॉ. मृणाली बल्लाळ, क्लब सदस्य डॉ. बल्लाळ, शालेय व्यवस्थापन समितीचे अध्यक्ष श्री. पृथ्वीराज बावणे तसेच हिंगणी सर्कल प्रमुख मनोज वाघमारे उपस्थित होते.
कार्यक्रमाची सुरुवात संस्थेचे संस्थापक अध्यक्ष स्वर्गीय दाआजी उपाख्य बापुरावजी देशमुख आणि माता सरस्वती यांच्या प्रतिमेचे पूजन करून करण्यात आली.
यावेळी बोलताना रोटरी क्लबचे अध्यक्ष डॉ. मुंगळकर यांनी सांगितले की, ग्रामीण भागातील विद्यार्थ्यांना शाळेत येण्यासाठी होणारा त्रास कमी व्हावा आणि त्यांचा वेळ वाचावा, या हेतूने दरवर्षी सायकल वाटपाचा उपक्रम राबविला जातो.
रोटरी क्लबच्या सचिव सौ. शिल्पा धर्माधिकारी यांनी विद्यार्थ्यांना सायकलींचा योग्य वापर करून चांगले शिक्षण घेण्याचे आवाहन केले. “या सायकली किमान पाच वर्षे व्यवस्थित वापरा आणि शिक्षणाच्या जोरावर शाळेचे व गावाचे नाव उज्ज्वल करा,” असे त्या म्हणाल्या.
मुख्याध्यापक श्री. ठाकरे सर यांनी आपल्या मनोगतात रोटरी क्लबच्या सामाजिक बांधिलकीचे कौतुक करत, “ग्रामीण भागातील इयत्ता ५ वी ते १० वीच्या विद्यार्थ्यांना २० सायकलींचे वाटप करण्यात आले आहे. त्यामुळे विद्यार्थ्यांचा वेळ वाचून त्यांना अभ्यासासाठी अधिक वेळ देता येईल,” असे सांगितले. तसेच शाळेच्या वतीने रोटरी क्लब होरायझन नागपूरचे आभार मानले.
या कार्यक्रमाला इयत्ता ५ वी ते १० वीचे लाभार्थी विद्यार्थी, पालक, गावातील मान्यवर तसेच शाळेचे ग्रंथपाल श्री. अशोक काळे, लिपिक श्री. बोनी देवढे, श्री. सतीश तेलरांधे आणि देवेंद्र वैद्य उपस्थित होते.
कार्यक्रमाचे सूत्रसंचालन श्री. नरेंद्र ढवळे सर यांनी केले, तर आभार प्रदर्शन जेष्ठ शिक्षक श्री. अनिल लोहकरे सर यांनी केले.
