प्रतिनिधी | वर्धा
वर्धा जिल्ह्यात अवैध दारू विक्री आणि वाहतुकीविरोधात स्थानिक गुन्हे शाखेने मोठी कारवाई करत जवळपास १९ लाख ८२ हजार ४०० रुपयांचा मुद्देमाल जप्त केला आहे. या कारवाईत दोन चारचाकी वाहने, विदेशी दारू, बिअर तसेच देशी दारूचा मोठा साठा हस्तगत करण्यात आला आहे.
जिल्हा पोलीस अधीक्षक Saurabh Kumar Agrawal यांनी अवैध दारू विक्री व वाहतूक करणाऱ्यांवर कठोर कारवाई करण्याचे आदेश दिल्यानंतर स्थानिक गुन्हे शाखेने विशेष मोहीम सुरू केली आहे.
दि. १५ जून २०२६ रोजी स्थानिक गुन्हे शाखेच्या पथकाला मिळालेल्या गुप्त माहितीनुसार सेलू पोलीस ठाण्याच्या हद्दीतील दंढारे टी-पॉईंट येथे सापळा रचण्यात आला. यावेळी स्कॉर्पिओ वाहन क्रमांक MH 46 AL 5664 ची तपासणी केली असता आरोपी तेजस राजेंद्र मांढरे आणि प्रणय मारुती डुकरे (दोघेही रा. सेलू, जि. वर्धा) हे मोठ्या प्रमाणात विदेशी दारू आणि बिअरची वाहतूक करताना रंगेहाथ आढळून आले.
पोलिसांनी वाहनातून ३० खोके विदेशी दारू आणि १ खोका बिअर असा मोठा साठा जप्त केला. या कारवाईत स्कॉर्पिओ वाहनासह एकूण १७ लाख १२ हजार ४०० रुपयांचा मुद्देमाल जप्त करण्यात आला.
यानंतर दुसऱ्या कारवाईत सुलभ ज्ञानेश्वर डायगव्हाणे (वय ३०, रा. वाहितपूर वॉर्ड नं. ३, सेलू) हा अल्टो कार क्रमांक MH 32 C 0860 मधून दोन प्लास्टिक पिशव्यांमध्ये भरलेल्या २०० देशी दारूच्या शिशांची वाहतूक करताना आढळून आला. त्याच्याकडून अल्टो कारसह २ लाख ७० हजार रुपयांचा मुद्देमाल जप्त करण्यात आला.
या दोन्ही कारवायांमध्ये एकूण १९ लाख ८२ हजार ४०० रुपयांचा मुद्देमाल जप्त करण्यात आला असून आरोपींविरोधात सेलू पोलीस ठाण्यात महाराष्ट्र दारूबंदी कायद्यान्वये गुन्हे दाखल करण्यात आले आहेत.
ही कारवाई अपर पोलीस अधीक्षक सदाशिव वाघमारे यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद चौधरी तसेच पोलीस कर्मचारी अरविंद येनुरकर, रोशन निंबोळकर, रवि पुरोहित आणि अभिषेक नाईक यांनी केली.
