नगरसेवक रामदास शेवाळे यांच्या हस्ते विद्यार्थ्यांना पुष्पगुच्छ देऊन शुभेच्छा
कळंबोली | प्रतिनिधी
नवीन शैक्षणिक वर्षाच्या प्रारंभानिमित्त कळंबोली सेक्टर-1E येथील नवीन सुधागड शाळेत विद्यार्थ्यांच्या स्वागताचा उत्साहपूर्ण कार्यक्रम आयोजित करण्यात आला. शाळेच्या पहिल्याच दिवशी विद्यार्थ्यांमध्ये नवचैतन्य, आत्मविश्वास आणि आनंद निर्माण व्हावा या उद्देशाने विशेष स्वागत सोहळ्याचे आयोजन करण्यात आले.
या कार्यक्रमात शिवसेना पनवेल जिल्हाध्यक्ष तथा नगरसेवक रामदास शेवाळे यांच्या हस्ते विद्यार्थ्यांना पुष्पगुच्छ देऊन स्वागत करण्यात आले. नवीन शैक्षणिक वर्षाची सुरुवात आनंददायी आणि प्रेरणादायी वातावरणात व्हावी यासाठी विद्यार्थ्यांना शुभेच्छा देण्यात आल्या.
यावेळी विद्यार्थ्यांना मार्गदर्शन करताना रामदास शेवाळे यांनी मन लावून अभ्यास करण्याचे, शिस्त आणि संस्कार जोपासण्याचे तसेच आई-वडील, शिक्षक आणि शाळेचे नाव उज्ज्वल करण्याचे आवाहन केले. शिक्षणाच्या बळावर उज्ज्वल भविष्य घडवत यशाच्या नव्या शिखरांकडे वाटचाल करण्याचा संदेश त्यांनी विद्यार्थ्यांना दिला.
या प्रसंगी नगरसेविका सायली सरक, नगरसेवक रवींद्र भगत, प्राचार्य राजेंद्र पालवे, शिक्षक, शिक्षकेतर कर्मचारी तसेच पालक वर्ग उपस्थित होते. विद्यार्थ्यांच्या चेहऱ्यावरील आनंद आणि उत्साहामुळे संपूर्ण परिसरात सकारात्मक वातावरण निर्माण झाले होते.
नवीन शैक्षणिक वर्षाच्या पहिल्याच दिवशी विद्यार्थ्यांचे अशा उत्साहपूर्ण वातावरणात स्वागत झाल्याने विद्यार्थ्यांमध्ये नव्या वर्षाबद्दल उत्सुकता आणि आत्मविश्वास वाढल्याचे चित्र पाहायला मिळाले.
