परतूर | प्रतिनिधी
परतूर येथील किड्स वर्ल्ड इंग्लिश स्कूलमध्ये आयोजित स्नेहसंमेलनाचा एक व्हिडिओ सोशल मीडियावर व्हायरल झाल्यानंतर या प्रकरणाने गंभीर वळण घेतले आहे. या व्हिडिओच्या आधारे माजी मंत्री तथा आमदार बबनराव लोणीकर यांनी संबंधित शाळेची मान्यता तात्काळ रद्द करून संस्था अध्यक्ष, शिक्षक आणि कार्यक्रम आयोजकांवर गुन्हे दाखल करून कठोर कारवाई करण्याची मागणी केली आहे.
आमदार लोणीकर यांनी प्रसिद्धीस दिलेल्या निवेदनात म्हटले आहे की, व्हायरल व्हिडिओमध्ये विद्यार्थ्यांकडून कथितरित्या “गुस्ताख-ए-नबी की एक ही सजा, सर तन से जुदा” या वादग्रस्त घोषणेशी संबंधित गाण्यावर नृत्य सादर करण्यात आल्याचे दिसत आहे. तसेच विद्यार्थ्यांच्या हातात तलवारी देण्यात आल्याचाही दावा करण्यात आला आहे.
यासोबतच कार्यक्रमादरम्यान काही वादग्रस्त छायाचित्रांचे प्रदर्शन करण्यात आल्याचेही व्हिडिओत दिसून येत असल्याचा आरोप करण्यात आला आहे. या प्रकारामुळे समाजात चुकीचा संदेश जाऊ शकतो तसेच विद्यार्थ्यांच्या मानसिकतेवर विपरीत परिणाम होण्याची शक्यता असल्याचे लोणीकर यांनी म्हटले आहे.
या प्रकरणाचा संदर्भ देताना त्यांनी अलाहाबाद उच्च न्यायालयाने अशा प्रकारच्या घोषणांबाबत केलेल्या निरीक्षणांचाही उल्लेख केला. अशा घोषणा समाजात तेढ निर्माण करू शकतात आणि हिंसक प्रवृत्तींना चालना देऊ शकतात, असे न्यायालयाने नमूद केल्याचे त्यांनी सांगितले.
आमदार लोणीकर यांनी जिल्हाधिकारी, जिल्हा पोलीस अधीक्षक, उपविभागीय पोलीस अधिकारी तसेच शिक्षण विभागातील अधिकाऱ्यांशी संपर्क साधून व्हायरल व्हिडिओची सत्यता तपासण्याच्या आणि दोषींवर तातडीने कारवाई करण्याच्या सूचना दिल्याचे सांगितले. संबंधितांवर राष्ट्रीय सुरक्षा कायदा अंतर्गतही कारवाई करण्याची मागणी त्यांनी प्रशासनाकडे केली आहे.
दरम्यान, व्हायरल व्हिडिओची सत्यता, त्यातील दृश्ये आणि कार्यक्रमातील सादरीकरणाबाबत अधिकृत चौकशी अहवाल अद्याप समोर आलेला नसून प्रशासनाकडून तपास सुरू असल्याची माहिती मिळत आहे.
