हदगाव | प्रतिनिधी :
नांदेड-तामसा मार्गावरील लहान लोन परिसरात मादी बिबट्यासह तिच्या तीन पिलांचे दर्शन झाल्याने परिसरात भीतीचे वातावरण निर्माण झाले आहे. रात्रीच्या वेळी रस्त्यालगत बिबट्यांची हालचाल दिसून आल्याने वाहन चालक आणि नागरिकांमध्ये चिंतेचे वातावरण पसरले आहे.
स्थानिक नागरिकांनी बिबट्या आणि पिलांना पाहिल्यानंतर याबाबत वनविभागाला माहिती दिली. त्यानंतर वनविभागाच्या अधिकाऱ्यांनी परिसराची पाहणी करून नागरिकांना सतर्क राहण्याचे आवाहन केले आहे.
वनविभागाकडून विशेषतः रात्री प्रवास करणाऱ्या वाहन चालकांना सावधगिरी बाळगण्याचा इशारा देण्यात आला आहे. या मार्गावरून जाताना वाहनांचा वेग मर्यादित ठेवावा, अचानक थांबणे किंवा प्राण्यांच्या जवळ जाण्याचा प्रयत्न करू नये, असे आवाहन करण्यात आले आहे.
तसेच शेतकरी आणि परिसरातील नागरिकांनी रात्रीच्या वेळी एकटे बाहेर पडणे टाळावे, लहान मुलांवर लक्ष ठेवावे आणि कोणत्याही प्रकारची वन्यप्राण्यांची हालचाल आढळल्यास तात्काळ वनविभागाशी संपर्क साधावा, असेही सांगण्यात आले आहे.
वनविभाग परिस्थितीवर लक्ष ठेवून असून, बिबट्यांच्या हालचालींवर देखरेख ठेवण्यासाठी आवश्यक उपाययोजना करण्यात येत असल्याची माहिती सूत्रांनी दिली.
