वाळकी येथील जिल्हा परिषद शाळेत प्रवेशोत्सव उत्साहात साजरा

हदगाव | प्रतिनिधी :

वाळकी येथील जिल्हा परिषद शाळेत नवीन शैक्षणिक वर्षानिमित्त प्रवेशोत्सव कार्यक्रम मोठ्या उत्साहात साजरा करण्यात आला. शाळेच्या वतीने विद्यार्थ्यांचे आनंदी वातावरणात स्वागत करण्यात आले.

यावेळी शाळेचे मुख्याध्यापक सतीश वाघमारे सर, साळुंके मॅडम तसेच नयुम पठाण यांनी विद्यार्थ्यांसोबत गावातून प्रभात फेरी काढली. या प्रभात फेरीच्या माध्यमातून पालकांमध्ये जिल्हा परिषद शाळांबद्दल जागरूकता निर्माण करण्यात आली तसेच शासकीय शाळांमधील शैक्षणिक गुणवत्तेबाबत माहिती देण्यात आली.

नवीन प्रवेश घेतलेल्या विद्यार्थ्यांचे फुले आणि पुस्तके देऊन स्वागत करण्यात आले. पहिल्याच दिवशी विद्यार्थ्यांमध्ये उत्साहाचे वातावरण पाहायला मिळाले. शिक्षकांनी विद्यार्थ्यांना नवीन शैक्षणिक वर्षासाठी शुभेच्छा देत नियमित शिक्षण घेण्याचे आवाहन केले.

कार्यक्रमामुळे पालक, विद्यार्थी आणि ग्रामस्थांमध्ये आनंदाचे वातावरण निर्माण झाले होते.