जालना जिल्ह्यातील परतूर येथील किड्स वर्ल्ड इंग्लिश स्कूल च्या वार्षिक स्नेहसंमेलन कार्यक्रमावरून वाद निर्माण झाला आहे. कार्यक्रमादरम्यान विद्यार्थ्यांकडून हातात डमी तलवारी देऊन एका पाकिस्तानी गाण्यावर नृत्य सादर करण्यात आल्याचा आरोप करण्यात येत आहे. तसेच कार्यक्रमाच्या पार्श्वभूमीवर पाकिस्तानचे तत्कालीन राज्यपाल सलमान तासीर यांच्या हत्येप्रकरणी चर्चेत आलेल्या मुमताज कादरी याचा फोटो लावण्यात आल्याचा दावा काही नागरिकांकडून करण्यात आला आहे.
या घटनेमुळे परिसरात तीव्र प्रतिक्रिया उमटत असून, शाळांमधील सांस्कृतिक कार्यक्रमांच्या आशयाबाबत प्रश्न उपस्थित केले जात आहेत. संबंधित शाळा ही सीबीएसईशी संलग्न असल्याचा दावा करण्यात येत असून, विद्यार्थ्यांमध्ये चुकीचे संदेश जाण्याची शक्यता व्यक्त केली जात आहे.
या प्रकरणाची सखोल चौकशी करून सत्य समोर आणावे, तसेच आवश्यक असल्यास संबंधितांवर कायदेशीर कारवाई करावी, अशी मागणी विविध स्तरांतून होत आहे. विशेषतः राष्ट्रीय बाल हक्क संरक्षण आयोग (NCPCR) तसेच सुरक्षा यंत्रणांनी या घटनेकडे गांभीर्याने पाहण्याची मागणी नागरिकांकडून करण्यात आली आहे.
दरम्यान, या प्रकरणाबाबत संबंधित शाळा प्रशासनाची अधिकृत भूमिका अद्याप समोर आलेली नाही. स्थानिक प्रशासन आणि शिक्षण विभागाकडून पुढील चौकशी सुरू होण्याची शक्यता व्यक्त केली जात आहे.
