प्रतिनिधी :-
कुरुंदवाड :- कुरुंदवाड शहरात मोहरम हा धार्मिक श्रद्धा, सामाजिक सलोखा आणि ऐक्याचे प्रतीक असलेला सण असून, सर्वांनी हा सण शांततेत आणि उत्साहात साजरा करावा, असे आवाहन कुरुंदवाड पोलीस ठाण्याचे सहाय्यक पोलीस निरीक्षक संतोष माने यांनी केले.
कुरुंदवाड पोलीस ठाण्यात पीर पंजा कमिटी तसेच पीर परिसरातील नागरिकांच्या उपस्थितीत आयोजित शांतता बैठकीत ते बोलत होते. यावेळी फारूक जमादार, अभिजीत पाटील, बापूसो असंगे आदी प्रमुख उपस्थित होते.
मोहरम काळात होणाऱ्या ७ वी भेट, ८ वी भेट, ९ वीची खतल रात्र तसेच १० वी भेट आणि ताबूत विसर्जन हे सर्व धार्मिक कार्यक्रम अत्यंत शांततेत आणि शिस्तबद्ध पद्धतीने पार पाडावेत, असे त्यांनी सांगितले. मिरवणुकांच्या वेळी कोणताही अनुचित प्रकार घडू नये यासाठी कमिटीचे अध्यक्ष, उपाध्यक्ष, सचिव आणि पदाधिकाऱ्यांनी विशेष दक्षता घ्यावी, असेही त्यांनी नमूद केले.
बैठकीमध्ये मोहरम कालावधीत होणाऱ्या धार्मिक कार्यक्रमांचे नियोजन, मिरवणुकांचे वेळापत्रक, वाहतूक व्यवस्थापन तसेच नागरिकांच्या सुरक्षिततेसंदर्भात सविस्तर चर्चा करण्यात आली. भेटीच्या मिरवणुका नियोजित वेळेत सुरू करून वेळेत पूर्ण कराव्यात व कायदा-सुव्यवस्था अबाधित राखण्यासाठी सर्वांनी पोलीस प्रशासनास सहकार्य करावे, असे आवाहन सपोनि माने यांनी केले.
यावेळी उपनिरीक्षक जीवन पाटील यांनी मार्गदर्शन करताना नागरिकांनी कोणत्याही अफवांवर विश्वास ठेवू नये तसेच संशयास्पद घटना आढळल्यास तात्काळ पोलीस प्रशासनाशी संपर्क साधावा, असे सांगितले.
बैठकीस जहागीर जमादार (मिस्त्री), हरिबा शेडबाळे, नासिर आंबी, दस्तगीर अपराध, सादिक दबासे, चंद्रकांत घडसे, शब्बीर म्हतापे, मेहबूब मोमीन, सोहेब मोमीन, मुस्तफा मुल्ला आदी उपस्थित होते. कार्यक्रमाचे आभार पोलीस नाईक नितीन साबळे यांनी मानले.
