जळकोट : जळकोट येथील कर्तव्यदक्ष, उपक्रमशील आणि विद्यार्थ्यांच्या सर्वांगीण विकासासाठी सातत्याने कार्यरत असलेले मुख्याध्यापक पी. व्ही. टेकले यांना लातूर येथील राजर्षी शाहू प्रतिष्ठानच्या वतीने प्रदान करण्यात येणारा प्रतिष्ठेचा ‘राजर्षी शाहू आदर्श शिक्षक पुरस्कार’ जाहीर झाला आहे.
टेकले सरांनी विविध शैक्षणिक व सामाजिक उपक्रमांच्या माध्यमातून प्रशालेची वेगळी ओळख निर्माण केली आहे. विद्यार्थ्यांना गुणवत्तापूर्ण शिक्षण मिळावे, त्यांचा सर्वांगीण विकास व्हावा आणि शाळेचा शैक्षणिक दर्जा उंचावावा यासाठी त्यांनी सातत्याने परिश्रम घेतले आहेत. त्यांच्या या उल्लेखनीय कार्याची दखल घेत त्यांना हा प्रतिष्ठेचा पुरस्कार जाहीर करण्यात आला आहे.
या पुरस्कारामुळे जळकोट तालुक्यातील शिक्षक वर्गात आनंदाचे वातावरण निर्माण झाले असून, तालुक्यातील नागरिक, मान्यवर तसेच जिल्हा परिषद शाळांतील मुख्याध्यापक, शिक्षक व कर्मचारी यांच्याकडून टेकले सरांवर अभिनंदनाचा वर्षाव होत आहे.
“टेकले सरांच्या मार्गदर्शनाखाली विद्यार्थ्यांना गुणवत्तापूर्ण शिक्षण मिळत राहिले असून त्यांनी शाळेला प्रगतीच्या दिशेने नेले,” अशा भावना अनेकांनी व्यक्त केल्या.
यावेळी डॉ. कलवले संजय यांनीही टेकले सरांचे अभिनंदन करून त्यांच्या पुढील वाटचालीस शुभेच्छा दिल्या.
