खटाव प्रतिनिधी | महाराष्ट्र, दि. 16 जून
खटाव तालुक्यातील निमसोड येथील श्रीमती सुशीला तुळशीराम तावरे यांनी प्रामाणिकतेचे उत्कृष्ट उदाहरण घालून दिले आहे. त्यांनी तब्बल तीन तोळे सोन्याचे दागिने, रोख रक्कम तसेच महत्त्वाची कागदपत्रे असलेली हरवलेली पर्स शोधून ती मूळ मालकाच्या ताब्यात दिली. त्यांच्या या प्रामाणिक कृतीचे निमसोड व कुरोली सिद्धेश्वर परिसरात सर्वत्र कौतुक होत आहे.
मिळालेल्या माहितीनुसार, कुरोली सिद्धेश्वर (कुरवली) येथील मूळ रहिवासी आणि सध्या मुंबई पोलीस दलात कार्यरत असलेले अजित सुरेश हिरवे व त्यांच्या पत्नी तनुजा हिरवे हे काही कामानिमित्त गावी आले होते. वडूज येथे दवाखान्यात भेट देताना तनुजा हिरवे यांच्या हातून चुकून पर्स हरवली.
पर्स हरवल्याचे लक्षात आल्यानंतर त्यांनी परिसरात बराच वेळ शोध घेतला, मात्र पर्स सापडली नाही. त्यानंतर हिरवे कुटुंबीयांनी वडूज पोलीस ठाण्यात याबाबत तक्रार दाखल केली. हरवलेल्या पर्समध्ये तीन तोळ्यांचे मंगळसूत्र, दोन सोन्याच्या अंगठ्या, रोख रक्कम तसेच आधार कार्ड, ओळखपत्र, बँकेची कागदपत्रे आणि क्रेडिट कार्ड अशी महत्त्वाची कागदपत्रे होती.
चार ते पाच दिवस शोध सुरू असतानाही पर्स न सापडल्याने हिरवे कुटुंबीय मुंबईत परतले. दरम्यान, त्याच दिवशी निमसोड येथील श्रीमती सुशीला तावरे यांना वडूज येथे ती पर्स सापडली. त्यांनी कोणताही विलंब न करता ही पर्स मूळ मालकाच्या ताब्यात दिली.
त्यांच्या या प्रामाणिक कृतीचे परिसरात कौतुक होत असून, “अजूनही समाजात प्रामाणिकता जिवंत आहे” अशी भावना नागरिकांकडून व्यक्त केली जात आहे.
