शहादा, दि. 17 (प्रतिनिधी)
शहरातील गुर्जर गल्ली, गांधी चौक परिसरात ग्रामदैवत स्वरूप भव्य रासखांब प्रतिष्ठापना व श्री राधाकृष्ण पूजन सोहळा अत्यंत धार्मिक आणि उत्साहपूर्ण वातावरणात पार पडला. परिसराच्या सुख, समृद्धी, शांतता आणि आरोग्यासाठी हा सोहळा गुर्जर समाजातील 180 कुटुंबे व पटेल रास मंडळ यांच्या वतीने आयोजित करण्यात आला होता.
गेल्या अनेक वर्षांपासून या भागात फिरता रासखांब असल्याने त्याला निश्चित जागा नव्हती. त्यामुळे प्रत्येक कार्यक्रमासाठी तो वेगवेगळ्या ठिकाणी हलवावा लागत असे. ही अडचण दूर करण्यासाठी सर्व समाजबांधवांनी एकत्र येऊन गांधी चौकात रासखांबासाठी कायमस्वरूपी जागा निश्चित केली व मजबूत चौथरा उभारण्यात आला. अखेर आज विधीवत पूजन करून या ठिकाणी रासखांबाची प्रतिष्ठापना करण्यात आली.
हा रासखांब खानदेशातील अत्यंत दुर्मिळ आणि वैशिष्ट्यपूर्ण कलाकृतींपैकी एक मानला जात आहे. या रासखांबासाठी 100 वर्षे जुने शिसम लाकूड वापरण्यात आले असून, त्याची उंची सुमारे 12 फूट आहे. तब्बल साडेपाच टन वजनाचा अखंड दगड पाया म्हणून वापरून साडेपाच फूट उंच चौथरा तयार करण्यात आला आहे.
खांबाच्या तळभागी सर्व दिशांना मुख असलेले आठ अश्व कोरण्यात आले आहेत. तसेच वरच्या भागात श्री राधाकृष्णाच्या चार-चार सुंदर कोरीव कलाकृती साकारण्यात आल्या आहेत. खांबावर दिव्यांची सोय असून, शिखरावर रथाचे चाक आणि भगवा झेंडा आकर्षण ठरत आहे. या प्रकारचे अष्टमुखी अश्व कोरीव काम संपूर्ण खानदेशात दुर्मिळ असल्याचे मानले जाते.
बुधवारी पहाटेपासूनच पाच पुरोहितांच्या मंत्रोच्चारात विधी सुरू झाले. सुमारे तीन तास चाललेल्या मुख्य पूजनानंतर सत्यनारायण कथेचे वाचन व महाप्रसाद वाटप करण्यात आले. यावेळी परिसरात भक्तीमय वातावरण निर्माण झाले होते.
या ठिकाणी दरवर्षी कोजागिरी पौर्णिमा व कार्तिकी त्रिपुरी पौर्णिमेला महिलांकडून विशेष पूजा व धार्मिक कार्यक्रमांचे आयोजन केले जाणार आहे.
या प्रसंगी माजी नगरसेवक सुभाष पाटील, किशोर पाटील, सतीश पाटील, हिरालाल पाटील, सुरेश चौधरी, नगरसेवक सुनील पाटील, माजी नगरसेवक राकेश पाटील, धनराज पाटील, सेवानिवृत्त प्राचार्य जे.डी. पाटील, प्रदीप पटेल यांच्यासह अनेक समाजबांधव व महिला मोठ्या संख्येने उपस्थित होत्या.
या ऐतिहासिक आणि धार्मिक उपक्रमामुळे शहादा शहरात उत्साहाचे आणि आनंदाचे वातावरण निर्माण झाले आहे.
