शहाद्यात वाल्मिकी माध्यमिक विद्यालयात शैक्षणिक वर्षाची उत्साहपूर्ण सुरुवात; पुस्तक वाटप व पर्यावरण प्रतिज्ञेने विद्यार्थ्यांचा उत्साह द्विगुणित

शहादा, दि. 17 (प्रतिनिधी)

पुरुषोत्तमनगर येथील वाल्मिकी माध्यमिक विद्यालयात नवीन शैक्षणिक वर्षाची सुरुवात अत्यंत उत्साहपूर्ण आणि आनंदी वातावरणात करण्यात आली. सुट्टीनंतर शाळेची घंटा वाजताच विद्यार्थ्यांच्या किलबिलाटाने संपूर्ण परिसर गजबजून गेला.

पहिल्याच दिवशी विद्यार्थ्यांचे गुलाबपुष्प देऊन मुख्याध्यापिका व शिक्षकांनी उत्साहपूर्ण स्वागत केले. शाळेचा पहिला दिवस संस्मरणीय व्हावा यासाठी विद्यार्थ्यांना शासनाकडून प्राप्त झालेली मोफत पाठ्यपुस्तके मान्यवरांच्या हस्ते वितरित करण्यात आली.

पुस्तके मिळताच विद्यार्थ्यांचा आनंद द्विगुणित झाला असून शिक्षणाबाबत नव्या जोमाने सुरुवात करण्याचा उत्साह दिसून आला. तसेच विद्यार्थ्यांना अल्पोपहार देऊन त्यांचा दिवस अधिक आनंददायी करण्यात आला.

या प्रसंगी विद्यार्थ्यांकडून पर्यावरण संवर्धनाची सामूहिक प्रतिज्ञा घेण्यात आली. झाडे लावणे, पाण्याचा अपव्यय टाळणे आणि प्लास्टिकचा वापर कमी करण्याचा संकल्प विद्यार्थ्यांनी केला.

मुख्याध्यापिका सीमा पाटील यांनी विद्यार्थ्यांना नवीन शैक्षणिक वर्षात सातत्याने अभ्यास करून यश मिळवण्याचे मार्गदर्शन केले. पर्यवेक्षक महेश कुलकर्णी यांच्यासह शिक्षक व शिक्षकेतर कर्मचारी या कार्यक्रमास उपस्थित होते.

शाळा व्यवस्थापनाने केलेल्या सुंदर नियोजनाचे पालक व स्थानिक नागरिकांकडून कौतुक करण्यात येत आहे.