जळगाव जिल्ह्यातील खानदेशातील नामवंत कवी, लेखक स्व. एस. सी. जगदाने यांना द्वितीय पुण्यस्मरणानिमित्त अभिवादन

व्हिजन फाउंडेशनतर्फे वृक्षारोपण

जळगाव प्रतिनिधी :

जळगाव जिल्ह्यातील अमळनेर तालुक्यातील झाडी गावचे विचारवंत कवी, लेखक, साहित्यिक व गीतकार स्वर्गीय श्री. एस. सी. जगदाने (शेणफडू चिंधा जगदाने) यांच्या द्वितीय पुण्यस्मरणानिमित्त व्हिजन फाउंडेशनच्या वतीने वृक्षारोपण कार्यक्रमाचे आयोजन करून त्यांना विनम्र अभिवादन करण्यात आले.

स्व. कवी जगदाने यांनी आपल्या लेखणीच्या माध्यमातून समाज प्रबोधनाचे कार्य केले. त्यांनी समाज प्रबोधनपर गीते, भावगीते, भक्तीगीते, लोकगीते तसेच हुंडाविरोधी गीते लिहून ग्रामीण भागात जनजागृती घडवून आणली. खेडेगावातील लग्नसमारंभांमध्ये हुंडाविरोधी विचार रुजवण्याचे कार्य त्यांनी प्रभावीपणे केले.

ग्रामीण भागातील लोकांनी शिक्षणापासून वंचित राहू नये, तसेच कामाच्या व्यस्ततेतून स्वतःसाठी वेळ काढून शिक्षण व प्रबोधनाकडे वळावे, यासाठी त्यांनी “रात्रीचा प्रौढवर्ग शिक्षक” म्हणूनही योगदान दिले.

समाजाला आपण काहीतरी देणे लागतो या भावनेतून त्यांनी सातत्याने समाजकार्य केले असून विविध पुरस्कारांनी त्यांना गौरविण्यात आले आहे. त्यांच्या या कार्याचा आदर्श आजही प्रेरणादायी मानला जातो.

त्यांच्या द्वितीय पुण्यस्मरणानिमित्त चिरंजीव शिवलाल जगदाने यांनी व्हिजन फाउंडेशनच्या माध्यमातून वृक्षारोपण कार्यक्रमाचे आयोजन केले. यावेळी भावनिक होत त्यांनी सांगितले की, “माझ्या वडिलांनी केलेल्या समाजकार्याची पोचपावती त्यांना आयुष्यभर मिळत गेली असून त्यांचा समाजसेवेचा वारसा पुढे नेण्यासाठी आम्ही विविध उपक्रम राबवत आहोत.”

या कार्यक्रमामुळे परिसरात स्व. जगदाने यांच्या कार्याची आठवण जागृत झाली असून उपस्थितांनी त्यांना आदरांजली अर्पण केली.