कोळध्याचापाडा संघ विजेता; ग्रामीण खेळाडूंच्या कौशल्याला मिळाले व्यासपीठ
मोखाडा:
दिगंत स्वराज फाउंडेशनच्या वतीने मोखाडा तालुक्यातील ग्रामीण भागातील युवक-युवतींमध्ये हॉलीबॉल खेळाची आवड निर्माण व्हावी तसेच त्यांच्यातील क्रीडा कौशल्याला प्रोत्साहन मिळावे या उद्देशाने गेल्या वर्षभरापासून विविध गावपाड्यांमध्ये हॉलीबॉल प्रशिक्षण उपक्रम राबविण्यात आला होता. या उपक्रमाला ग्रामीण भागातून उत्स्फूर्त प्रतिसाद मिळाला.
या प्रशिक्षण उपक्रमामध्ये काकडपाडा, कोळध्याचापाडा, वखारीचापाडा, पोशेरा आणि पवारपाडा येथील खेळाडूंनी सक्रिय सहभाग नोंदविला. प्रशिक्षणाचा परिपाक म्हणून आयोजित करण्यात आलेल्या ‘स्वराज हॉलीबॉल लीग 2026’ चे सेमी फायनल आणि अंतिम सामने दिनांक 17 जून 2026 रोजी सीनियर कॉलेज, मोखाडा येथील मैदानावर मोठ्या उत्साहात पार पडले.
विशेष म्हणजे, स्पर्धेत मुलांच्या संघांसोबतच मुलींच्या दोन संघांनीही सहभाग घेतला. काकडपाडा मुली संघ आणि वखारीचापाडा मुली संघ यांनी उत्कृष्ट खेळाचे प्रदर्शन करून उपस्थित प्रेक्षकांची मने जिंकली.
स्पर्धेच्या अंतिम सामन्यांचे उद्घाटन सीनियर कॉलेज मोखाडा येथील प्राध्यापक दत्तात्रय भोये, दैनिक पुढारीचे पत्रकार हनीफभाई शेख तसेच पत्रकार संघाचे माजी अध्यक्ष ज्ञानेश्वर पालवे यांच्या हस्ते करण्यात आले. यावेळी मान्यवरांनी ग्रामीण भागातील खेळाडूंमध्ये प्रचंड क्षमता असून योग्य मार्गदर्शन व प्रशिक्षण मिळाल्यास ते राज्य आणि राष्ट्रीय स्तरावर यश संपादन करू शकतात, असा विश्वास व्यक्त केला.
पुरुषांच्या अंतिम सामन्यात अत्यंत चुरशीची लढत पाहायला मिळाली. या रोमांचक सामन्यात कोळध्याचापाडा संघाने विजेतेपद पटकावत प्रथम क्रमांक मिळविला, तर काकडपाडा संघाने उपविजेतेपदावर समाधान मानले. संपूर्ण स्पर्धेदरम्यान खेळाडूंनी दाखविलेली जिद्द, शिस्त आणि सांघिक खेळ हे प्रेक्षकांसाठी विशेष आकर्षण ठरले.
समारोप कार्यक्रमात दिगंत स्वराज फाउंडेशनच्या मुख्य कार्यकारी अधिकारी श्रद्धा शृंगारपुरे, दानिश शेख तसेच फाउंडेशनचे पदाधिकारी व कार्यकर्ते उपस्थित होते. यावेळी विजेते आणि सहभागी खेळाडूंना प्रशस्तीपत्र, मेडल आणि चषक देऊन गौरविण्यात आले.
ग्रामीण भागातील युवक-युवतींना क्रीडा क्षेत्रात संधी उपलब्ध करून देणारा दिगंत स्वराज फाउंडेशनचा हा उपक्रम कौतुकास्पद असल्याची भावना उपस्थितांनी व्यक्त केली. या स्पर्धेमुळे तालुक्यातील अनेक नवोदित खेळाडूंना आपली प्रतिभा सादर करण्याची संधी मिळाली असून, मोखाडा तालुक्यातील क्रीडा क्षेत्राला नवसंजीवनी मिळाल्याचे चित्र दिसून आले.
