कवी केशवसुत स्मारक, श्री कऱ्हाटेश्वर मंदिर, आरे-वारे समुद्रकिनारा आणि नेवरे येथील स्कुबा डायव्हिंगची माहिती
रत्नागिरी, दि. १८ जून : आकाशवाणी रत्नागिरीच्या लोकप्रिय पर्यटनविषयक ‘कोकण दर्शन’ या कार्यक्रमातून यंदा धार्मिक, साहित्यिक आणि जलक्रीडांचा अनोखा सफरनामा उलगडणार आहे. शुक्रवार, १९ जून रोजी सकाळी ८.४० वाजता या विशेष भागाचे प्रसारण होणार असून रत्नागिरी जिल्ह्यातील पर्यटन वैभवाची विविध रूपे श्रोत्यांना अनुभवता येणार आहेत.
दर शुक्रवारी प्रसारित होणाऱ्या ‘कोकण दर्शन’ कार्यक्रमात यावेळी गणपतीपुळे परिसरातील विविध पर्यटनस्थळांचा वेध घेण्यात आला आहे. मालगुंड येथील कवी केशवसुत स्मारक, श्री कऱ्हाटेश्वर मंदिर, पर्यटकांना भुरळ घालणारा आरे-वारे समुद्रकिनारा तसेच नेवरे येथील स्कुबा डायव्हिंग आणि विविध जलक्रीडांची माहिती या कार्यक्रमातून देण्यात येणार आहे.
या विशेष भागात हर्षदा भिडे, अमेय धोपटकर आणि मिलिंद मिरकर यांचा सहभाग असून पर्यटनामुळे निर्माण झालेल्या रोजगाराच्या संधी, गावपातळीवरील सुविधांचा विकास, धार्मिक वारशाचे जतन तसेच कोकणातील समृद्ध साहित्यिक परंपरेविषयी ते श्रोत्यांशी संवाद साधणार आहेत.
कार्यक्रमाचे लेखन सोनाली सावंत यांनी केले असून निवेदन आणि निर्मिती सहाय्य वंदना मुसळे व सोनाली सावंत यांनी केले आहे. विवेक वानखडे हे कार्यक्रमाचे सादरकर्ते आहेत.
‘कोकण दर्शन’ कार्यक्रमाचे प्रसारण मध्यम लहरी ११४३ किलोहर्ट्झ तसेच एफएम १०१.५ मेगाहर्ट्झवर ऐकता येणार आहे. याशिवाय ‘न्यूज ऑन एअर’ या मोबाईल अॅपवर कार्यक्रमाचे थेट प्रसारण उपलब्ध राहणार असून प्रसारणानंतर हा कार्यक्रम एआयआर रत्नागिरीच्या यूट्यूब चॅनेलवरही ऐकता येणार आहे.
रत्नागिरी जिल्ह्यातील पर्यटनाचे अंतरंग उलगडणारा हा विशेष भाग सर्व श्रोत्यांनी आवर्जून ऐकावा, असे आवाहन आकाशवाणी रत्नागिरीकडून करण्यात आले आहे.
