कवठेमहांकाळ प्रतिनिधी
सांगलीतील वेदांत बंडागर खून प्रकरणाच्या तपासात सांगली स्थानिक गुन्हे शाखेने (LCB) मोठी कारवाई करत कवठेमहांकाळ तालुक्यातील ढालगाव येथील संदेश घागरे (वय २२) याला अटक केली आहे. याच प्रकरणात एका अल्पवयीन साथीदारालाही ताब्यात घेण्यात आले असून त्याला बालसुधारगृहात पाठविण्यात आले आहे.
या खून प्रकरणातील मुख्य आरोपी निलेश गडदे याची पोलिसांकडून कसून चौकशी सुरू असून त्यातून अनेक धागेदोरे समोर येत आहेत. चौकशीदरम्यान पोलिसांनी दोन गावठी बनावटीची पिस्तुले जप्त केली आहेत. ही शस्त्रे फरार संशयित विशाल चौगुले याने पूर्वी पुरवल्याचे तपासात निष्पन्न झाले आहे.
विशाल चौगुले हा अद्याप फरार असून त्याचा शोध सांगली एलसीबीचे पोलीस निरीक्षक संजीवकुमार झाडे यांच्या मार्गदर्शनाखाली सुरू आहे. उर्वरित आरोपींनाही लवकरच अटक करण्यात येईल, अशी माहिती पोलिसांकडून देण्यात आली आहे.
दरम्यान, या प्रकरणात ढालगाव येथील युवकाचे नाव समोर आल्याने ढालगावसह कवठेमहांकाळ तालुक्यात भीतीचे वातावरण निर्माण झाले आहे. पोलिसांकडून विविध ठिकाणी छापेमारी सुरू असून प्रकरणाचा अधिक सखोल तपास सुरू आहे.
