सिंधुदुर्ग प्रतिनिधी :
नेपाळची राजधानी काठमांडू येथे आयोजित करण्यात आलेल्या १७ व्या आंतरराष्ट्रीय कराटे चॅम्पियनशिप २०२६ स्पर्धेत सिंधुदुर्ग जिल्ह्यातील वाघेरी गावच्या युवा कराटेपटूंनी उल्लेखनीय कामगिरी करत आंतरराष्ट्रीय स्तरावर गावाचे आणि जिल्ह्याचे नाव उज्ज्वल केले आहे.
या प्रतिष्ठेच्या स्पर्धेत वाघेरी येथील कौशिक राणे याने उत्कृष्ट खेळाचे प्रदर्शन करत रौप्यपदक (Silver Medal) पटकावले. तसेच समृद्धी साटम हिने दमदार आणि जिद्दीच्या खेळाच्या जोरावर कांस्यपदक (Bronze Medal) मिळवून भारताचा तिरंगा अभिमानाने फडकवला.
दोन्ही खेळाडूंनी आंतरराष्ट्रीय स्तरावर मिळवलेल्या या यशामुळे संपूर्ण वाघेरी परिसरात आनंदाचे वातावरण निर्माण झाले असून ग्रामस्थांकडून त्यांच्यावर शुभेच्छांचा वर्षाव होत आहे.
या उल्लेखनीय कामगिरीबद्दल ग्रामपंचायत वाघेरी-मठखुर्द, भारतीय जनता पक्षाचे पदाधिकारी तसेच ग्रामस्थांच्या वतीने कौशिक राणे आणि समृद्धी साटम यांचे मनःपूर्वक अभिनंदन करण्यात आले आहे. भविष्यातही राष्ट्रीय आणि आंतरराष्ट्रीय स्तरावर अशीच चमकदार कामगिरी करत गावाचे, जिल्ह्याचे आणि देशाचे नाव उंचावावे, अशा शुभेच्छा यावेळी व्यक्त करण्यात आल्या.
ग्रामीण भागातील खेळाडूंमध्येही प्रचंड गुणवत्ता आणि जिद्द असल्याचे या यशातून पुन्हा एकदा सिद्ध झाले आहे. योग्य मार्गदर्शन, मेहनत आणि सातत्यपूर्ण सरावाच्या जोरावर आंतरराष्ट्रीय स्तरावरही यश मिळवता येते, याचे प्रेरणादायी उदाहरण या युवा कराटेपटूंनी घालून दिले आहे.
“वाघेरीच्या मातीतून घडलेले हे यश संपूर्ण सिंधुदुर्ग जिल्ह्यासाठी अभिमानाची बाब आहे,” अशी भावना ग्रामस्थांनी व्यक्त केली.
