पोलीसांची धडक कारवाई; धारदार चॉपरसह मुद्देमाल जप्त
श्रीरामपूर (प्रतिनिधी) : शहरात बेकायदेशीररित्या गावठी पिस्टल, जिवंत काडतुसे आणि धारदार चॉपर बाळगणाऱ्या दोन आरोपींना श्रीरामपूर शहर पोलिसांनी अटक केली आहे. अप्पर पोलीस अधीक्षक कार्यालय आणि श्रीरामपूर शहर पोलीस स्टेशन यांच्या संयुक्त कारवाईत आरोपींकडून शस्त्रांसह इतर मुद्देमाल जप्त करण्यात आला आहे.
दि. १६ जून रोजी सायंकाळी अप्पर पोलीस अधीक्षक सोमनाथ वाघचौरे यांना शहरातील जर्मन हॉस्पिटलच्या मागील बाजूस असलेल्या पाण्याच्या फाट्याजवळ दोन संशयित इसम गावठी कट्टा आणि जिवंत काडतुसांसह फिरत असल्याची गुप्त माहिती मिळाली होती. या माहितीच्या आधारे शहर पोलीस स्टेशनचे पोलीस उपनिरीक्षक हंडाळ तसेच अप्पर पोलीस अधीक्षक कार्यालयातील पोलीस हेड कॉन्स्टेबल दादासाहेब लोंढे, पोलीस नाईक संदीप दरदंले, पोलीस कॉन्स्टेबल राजेंद्र बिरदवडे, सहदेव चव्हाण आणि अशोक खाडे यांच्या पथकाला कारवाईचे आदेश देण्यात आले.
पोलिस पथकाने संबंधित ठिकाणी छापा टाकला असता दोन संशयित इसम पांढऱ्या रंगाच्या जुपिटर दुचाकीजवळ दगडावर बसलेले दिसून आले. पोलिसांनी त्यांना ताब्यात घेऊन चौकशी केली असता त्यांनी आपली नावे नाझीम अन्वर पठाण (वय २५, रा. वॉर्ड क्र. २, श्रीरामपूर) आणि मोहम्मद जाफर खुदाबक्ष पटेल (वय १८, रा. काजी बाबा रोड, वॉर्ड क्र. २, श्रीरामपूर) अशी सांगितली.
झडतीदरम्यान नाझीम पठाण याच्याकडून एक देशी बनावटीचे पिस्टल, सिल्व्हर-काळ्या रंगाचा बट असलेले मॅगझिन आणि एक मोबाईल फोन जप्त करण्यात आला. तर मोहम्मद जाफर पटेल याच्याकडून दोन जिवंत काडतुसे, एक धारदार चॉपर आणि मोबाईल फोन हस्तगत करण्यात आला.
याप्रकरणी श्रीरामपूर शहर पोलीस ठाण्यात भारतीय हत्यार कायद्यानुसार कलम ३, ७, २५ (६) व २५ (७) अंतर्गत गुन्हा दाखल करण्यात आला असून पुढील तपास सुरू आहे.
