चामोर्शी, दि. १९ जून : चामोर्शी-गडचिरोली महामार्गावरील कुणघाडा फाट्याजवळ आज सकाळी साडेसहा वाजताच्या सुमारास भीषण अपघात झाला. या अपघातात दुचाकीस्वाराचा जागीच मृत्यू झाला.
मिळालेल्या माहितीनुसार, संजू मालू कोरसामी (वय ३०, रा. भामरागड) हे दुचाकीने गडचिरोलीहून येत असताना समोरून येणाऱ्या ट्रकला त्यांच्या दुचाकीची जोरदार धडक बसली. धडक इतकी भीषण होती की दुचाकी थेट ट्रकच्या मधोमध घुसली. या अपघातात संजू कोरसामी यांचा घटनास्थळीच मृत्यू झाला.
अपघातानंतर ट्रक चालक घटनास्थळावरून फरार झाल्याची माहिती समोर आली आहे. घटनेची माहिती मिळताच पोलिसांनी घटनास्थळी धाव घेत पंचनामा केला असून पुढील तपास सुरू केला आहे.
दरम्यान, प्रतिनिधीने पोलिस विभागाशी संपर्क साधून सीसीटीव्ही फुटेजबाबत विचारणा केली असता, दुचाकीस्वाराने वेगाने वाहन चालवल्याने वाहन अनियंत्रित होऊन हा अपघात घडल्याची प्राथमिक माहिती पोलिसांकडून देण्यात आली.
या दुर्दैवी घटनेमुळे परिसरात हळहळ व्यक्त करण्यात येत आहे.
