बालजगतातून ‘संवादिनीची सुरेल सफर’; २१ जून रोजी आकाशवाणी रत्नागिरी वर विशेष कार्यक्रम

रत्नागिरी | प्रतिनिधी

आकाशवाणी रत्नागिरी केंद्राच्या लोकप्रिय ‘बालजगत’ या कार्यक्रमांतर्गत ‘संवादिनीची सुरेल सफर’ हा विशेष कार्यक्रम रविवार, दि. २१ जून २०२६ रोजी सकाळी ९.३० वाजता प्रसारित होणार आहे. संवादिनी या वाद्याच्या सुरेल विश्वाची ओळख करून देत बालकलाकार आपल्या कलागुणांचे आकर्षक सादरीकरण या कार्यक्रमातून करणार आहेत.

या विशेष कार्यक्रमात हृषिकेश विनय मोंडकर, गिरीजा विश्वेश भिडे, स्वरूपा मंदार आठवले आणि आर्या संजय काटदरे हे बालकलाकार सहभागी होणार असून त्यांना प्राची निखिल रानडे यांचे मार्गदर्शन लाभले आहे.

कार्यक्रमाचे निवेदन सोनाली सावंत यांनी केले असून विवेक वानखडे हे सादरीकर्ते आहेत. बालकलाकारांच्या सुरेल सादरीकरणातून संवादिनी या वाद्याचे वैशिष्ट्य आणि संगीताची गोडी श्रोत्यांपर्यंत पोहोचविण्याचा प्रयत्न या कार्यक्रमातून करण्यात आला आहे.

हा कार्यक्रम आकाशवाणी रत्नागिरीच्या मध्यमलहरी ११४३ किलोहर्ट्झ तसेच एफएम १०१.५ मेगाहर्ट्झ या वाहिन्यांवर ऐकता येणार आहे. तसेच NewsOnAir मोबाईल अॅपवरही श्रोत्यांना कार्यक्रम उपलब्ध होणार आहे.

प्रसारणानंतर हा कार्यक्रम आकाशवाणी रत्नागिरीच्या YouTube वरील ‘airratnagiri1248’ या वाहिनीवरही पाहता येणार आहे. बालकलाकारांच्या सुरेल सादरीकरणाचा आनंद घेण्यासाठी श्रोत्यांनी या विशेष कार्यक्रमाचा लाभ घ्यावा, असे आवाहन आकाशवाणी रत्नागिरी केंद्रातर्फे करण्यात आले आहे.