चिखली | दि. १९ जून २०२६
पिंपरी-चिंचवड महानगरपालिका प्रशासनाने मोरेवस्ती येथील अष्टविनायक चौक परिसरात अनधिकृत बांधकामांविरोधात धडक कारवाई करत अतिक्रमणाचा काही भाग जेसीबीच्या साहाय्याने जमीनदोस्त केला. या कारवाईमुळे परिसरात एकच खळबळ उडाली.
शहरातील वाढत्या अनधिकृत बांधकामांबाबत सातत्याने तक्रारी प्राप्त होत असताना महापालिकेच्या अतिक्रमण निर्मूलन विभागाने पोलीस बंदोबस्तात ही मोहीम राबवली. कारवाईदरम्यान संबंधित बांधकामांचा काही भाग पाडण्यात आला.
महापालिकेच्या या कठोर कारवाईनंतर परिसरातील इतर अनधिकृत बांधकामधारकांमध्येही धास्तीचे वातावरण निर्माण झाले आहे. नियमांचे उल्लंघन करून उभारण्यात आलेल्या बांधकामांवर यापुढेही कठोर कारवाई सुरू राहणार असल्याचे संकेत प्रशासनाने दिले आहेत.
“नियम मोडणाऱ्यांवर कारवाई अटळ” असा स्पष्ट संदेश महापालिकेने या मोहिमेतून दिला असून, नागरिकांनी कोणतेही बांधकाम करण्यापूर्वी आवश्यक शासकीय परवानग्या घेण्याचे आवाहन करण्यात आले आहे.
