श्रीगोंदा | प्रतिनिधी
श्रीगोंदा येथील शारदा माध्यमिक विद्यालय व गुळवे ज्युनिअर कॉलेजच्या प्राचार्यपदी नैना वाळके ऊर्फ नैना देवराव दरेकर यांची नियुक्ती झाल्याबद्दल श्रीगोंदा तालुक्याचे आमदार विक्रमसिंह पाचपुते यांच्या हस्ते त्यांचा विशेष सत्कार करण्यात आला.
संस्थेचे अध्यक्ष दीपक होनराव यांनी वाळके यांच्या नियुक्तीचे अधिकृत पत्र प्रदान केले. या प्रतिष्ठेच्या आणि जबाबदारीच्या पदावर निवड झाल्याबद्दल आमदार पाचपुते यांनी त्यांचे अभिनंदन करत पुढील वाटचालीस शुभेच्छा दिल्या.
सत्कार प्रसंगी बोलताना आमदार विक्रमसिंह पाचपुते यांनी नैना वाळके यांच्या शैक्षणिक क्षेत्रातील अनुभव, कार्यतत्परता आणि विद्यार्थ्यांप्रती असलेल्या बांधिलकीचे कौतुक केले. त्यांच्या नेतृत्वाखाली संस्थेचा शैक्षणिक दर्जा अधिक उंचावेल तसेच विद्यार्थ्यांना गुणवत्तापूर्ण शिक्षणाची नवी दिशा मिळेल, असा विश्वास त्यांनी व्यक्त केला.
या नियुक्तीमुळे श्रीगोंदा तालुक्यासह शैक्षणिक वर्तुळातून नैना वाळके यांच्यावर अभिनंदनाचा वर्षाव होत आहे. आमदार विक्रमसिंह पाचपुते यांच्या हस्ते झालेल्या या सत्कारामुळे त्यांच्या पुढील शैक्षणिक प्रवासाला अधिक प्रेरणा आणि बळ मिळाल्याची भावना उपस्थितांनी व्यक्त केली.
