श्रीगोंदा | प्रतिनिधी
श्रीगोंदा तालुक्यातील हिरडगाव येथील गौरी शुगर अँड डिस्टिलरीज प्रायव्हेट लिमिटेड (युनिट क्रमांक ०४) येथे गळीत हंगाम २०२६-२७ च्या पूर्वतयारीचा महत्त्वपूर्ण टप्पा असलेल्या मिल रोलर पूजन समारंभाचे आयोजन गुरुवार, दि. १८ जून २०२६ रोजी उत्साहपूर्ण वातावरणात करण्यात आले.
ओंकार शुगर ग्रुप चे चेअरमन बाबुराव बोत्रे पाटील यांच्या मार्गदर्शनाखाली हा समारंभ पार पडला. यावेळी समूहाचे संचालक ओमराजे बाबुराव बोत्रेपाटील यांच्या शुभहस्ते विधिवत पूजा करून आगामी गळीत हंगामाच्या कामांना प्रारंभ करण्यात आला.
समारंभात बोलताना ओमराजे बोत्रेपाटील यांनी शेतकरी, कामगार आणि उद्योग यांच्यातील समन्वयाच्या बळावर ओंकार शुगर ग्रुपने अल्पावधीतच साखर उद्योगात वेगळी ओळख निर्माण केल्याचे सांगितले. आधुनिक तंत्रज्ञान, कार्यक्षम व्यवस्थापन आणि शेतकरी हिताला प्राधान्य देत आगामी गळीत हंगाम अधिक यशस्वी करण्याचा संकल्प त्यांनी व्यक्त केला.
यावेळी गळीत हंगाम २०२६-२७ च्या पूर्वतयारीचा आढावा घेत कारखान्यातील यांत्रिक दुरुस्ती, देखभाल व आवश्यक कामे प्रगतीपथावर असल्याची माहिती देण्यात आली. आगामी हंगामात अधिक क्षमतेने आणि कार्यक्षमतेने ऊस गाळप करण्यासाठी कारखाना सज्ज राहील, असा विश्वास व्यवस्थापनाकडून व्यक्त करण्यात आला.
या प्रसंगी कारखान्याचे जनरल मॅनेजर, सर्व खातेप्रमुख, विभागप्रमुख, अधिकारी, कर्मचारी, ऊस उत्पादक शेतकरी तसेच तोडणी वाहतूक ठेकेदार मोठ्या संख्येने उपस्थित होते. उपस्थितांनी नवीन गळीत हंगाम यशस्वी होण्यासाठी शुभेच्छा दिल्या.
मिल रोलर पूजनामुळे कारखान्याच्या गळीत हंगामाच्या तयारीला औपचारिक सुरुवात झाली असून, शेतकऱ्यांना उत्तम सेवा, वेळेवर ऊस गाळप आणि उद्योगाच्या सर्वांगीण प्रगतीसाठी कारखाना कटिबद्ध असल्याचे व्यवस्थापनाने स्पष्ट केले.
