मारेगाव प्रतिनिधी
मारेगाव तालुक्यातील रोहपाट गावालगत असलेल्या आंबेझरी शिवारात गोवंश तस्करीचा प्रकार उघडकीस आणण्यात मारेगाव पोलिसांना यश आले आहे. या प्रकरणी दोन आरोपींना अटक करण्यात आली असून पोलिसांनी वाहनासह मुद्देमाल जप्त केला आहे.
मिळालेल्या माहितीनुसार, डायल 112 वरून जनावरांची अवैध तस्करी होत असल्याची माहिती पोलिसांना मिळाली होती. त्यानंतर मारेगाव पोलीस ठाण्याचे पोलीस निरीक्षक सागर दानडे यांनी तातडीने सरफौजदार दत्तू किनाके व पोलीस शिपाई सागर दिपेवार यांना घटनास्थळी रवाना केले.
पोलिसांनी घटनास्थळी पोहोचून पाहणी केली असता टाटा मॅजिक मालवाहू वाहनामध्ये जनावरे अमानुष पद्धतीने कोंबून नेली जात असल्याचे निदर्शनास आले. तसेच घटनास्थळालगत असलेल्या एका कोठ्यामध्येही जनावरे कोंडून ठेवण्यात आल्याचे उघड झाले.
या कारवाईदरम्यान पोलिसांनी एमएच 29 बीई 0422 क्रमांकाचे टाटा मॅजिक वाहन ताब्यात घेतले. जप्त करण्यात आलेल्या वाहनाची अंदाजे किंमत तीन लाख रुपये असल्याची माहिती पोलिसांनी दिली.
या प्रकरणी मंगेश सुनील नेहारे (वय 29) व रतन गोविंदा टेकाम (वय 27, दोघेही रा. रोहपाट, ता. मारेगाव) यांना अटक करण्यात आली आहे. आरोपींविरुद्ध भारतीय न्याय संहिता (BNS) कलम 325, 3(5) अंतर्गत गुन्हा दाखल करण्यात आला आहे.
सदर कारवाई मारेगाव पोलीस ठाण्याचे पोलीस निरीक्षक सागर दानडे यांच्या मार्गदर्शनाखाली करण्यात आली असून पुढील तपास सुरू आहे.
